Sony e ka një strategji të re të marketingut dhe një metodë të re për emërtimin e pajisjeve të veta. Modelet të reja nga segmenti i mesëm i sipërm e mbajnë shenjën Xperia 10 dhe karakterizohen nga ekrani 21:9. Segmenti i ulët i tregut mbulohet nga modeli Xperia L3, i cili e mban sistemin e vjetër të emërimit dhe karakteristika më modeste.
Sony Xperia 10 Plus paraqet një lloj versioni të përballueshëm të modelit premium të Sonyt, Xperia 1. Telefoni e ka një ekran 6,5 inçësh IPS LCD, me raport të faqeve prej 21:9 dhe rezolucion prej 2520 x 1080p. Bateria ka kapacitet prej 3000mAh.
Në anën e pasme ndodhen dy kamera me modulin kryesor prej 12MP (sensor 1/2.8") dhe kamera 8MP telefoto (2x zoom). Telefoni mund të xhirojë video 4K në formate 16:9 dhe 21:9, dhe ka stabilizim elektronik SteadyShot. Në pjesën e përparme ndodhet kamera selfi 8MP, përcjell GSMArena.
E gjitha punon falë çipsetit Snapdragon 636, të kombinuar me 4GB RAM dhe 64GB hapësirë ruajtjeje (plus një sllot microSD për zgjerim deri në 512GB).
Sony Xperia 10 është model më kompakt, me një ekran 6 inçësh 1080p+ dhe raport prej 21:9. Sistemi i kamerave në pjesën e pasme ka sensorët 13MP + 5MP, dhe ende mund të xhirojë video në 4K dhe ka SteadyShot. Ofrohet e njëjta kamerë e përparme prej 8MP, shkruan KOHA Ditore.
Çipseti është reduktuar në Snapdragon 630, RAM-i ka kapacitet prej 3GB, ndërsa hapësira për ruajtje prej 64GB mund të rritet me ndihmën e kartelave microSD. Kapaciteti i baterisë është 2870mAh.
Në fund, ofrohet edhe modeli buxhetor Sony Xperia L3. Telefoni e ka një panel prej 7,7 inçëve 720p+, me raport prej 18:9. Sistemi me dy kamera në pjesën e prapme ka sensorë prej 13MP + 2MP, nuk e ka opsionin e xhirimit të videove në 4K ndërsa në pjesën e përparme është kamera 8MP.
Telefoni punon falë çipsetit MediaTek Helio P22, të kombinuar me 3GB RAM dhe 32GB hapësirë ruajtëse e cila mund të rritet.
Sa i përket softuerit, Xperia 10 dhe 10 Plus vijnë me Android 9.0 Pie, ndërsa Xperia L3 vjen me Android 8.0 Oreo.
