Kina ka dëbuar prodhuesin amerikan të çipeve Micron nga shitja e produkteve të saj te kompanitë kineze të cilat punojnë në projekte kyçe infrastrukturore për shkak të pretendimit të sigurisë kombëtare, shkruan Reuters.
Zhvillimi vjen pothuajse dy muaj pasi autoriteti i sigurisë kibernetike kineze nisi një hetim në fund të muajit mars për të analizuar rreziqet potenciale të sigurisë.
Kina thotë se produktet e prodhuar nga Micron Technology janë kërcënim për sigurinë kombëtare. Është lëvizja e parë madhore kundër një prodhuesi amerikan çipash ndërsa tensionet mes Pekinit dhe Uashingtonit po rriten.
SHBA-ja dhe Kina janë përfshirë në një luftë ekonomike dhe teknologjike. Amerika mori disa masa kundër industrisë së çipeve të Pekinit dhe investoi miliarda dollarë për të mbështetur sektorin e çipeve në vend.
Aksionet e Micronit ranë me 5.3 për qind menjëherë pas lajmit. Konsumatorët e Micronit në Kinë janë kryesisht prodhues smartfonësh dhe kompjuterësh personalë.
Kina është një treg kryesor për Micronin e cila gjeneroi 10 për qind të të ardhurave të kompanisë. Më 2022, Micron raportoi 30.7 miliardë dollarë të ardhura ku 3.3 miliardë erdhën nga Kina.
SHBA-ja më herët pati vendosur që ta ndalojë platformën TikTok, e cila ka bazën në Kinë, për zyrtarët e vendit.
