Rrjeti i madh social, Instagram, ka vendosur të kthejë disa prej ndryshimeve të nisura së fundmi, pas reagimeve të përdoruesve, përfshirë edhe yjet Kylie Jenner dhe Kim Kardashian.
Aplikacioni i fotografive dhe videove u akuzua se po imiton TikTokun pasi nisi të enjten ndryshimin, duke bërë që postimet të shfaqen në ekran të plotë si dhe ndryshimet në algoritëm që bënë që përdoruesve t’u shfaqen më shumë video nga ata që s’i ndjekin.
“Jam i kënaqur që rrezikuam – nëse nuk dështojmë herë pas here, nuk po mendojmë mjaftueshëm”, ka thënë shefi i Instagramit, Adam Mosseri, në një intervistë për “Platformer”. “Por padyshim na duhet të tërhiqemi prapa dhe të mbledhim idetë sërish. Kur të mësojmë, do të dalim me ide të reja. Andaj po punojmë këtu”.
Pas nisjes së ndryshimeve në Instagram, reagime pati nga shumë përdorues, të cilët ndoqën dy yjet televizive Kim Kardashian e Kylie Jenner që kritikuan haptas duke dalë me postimin “Bëjeni Instagramin sërish Instagram”. Fotografia e tyre e shpërndarë kishte edhe shkrimin “mos u përpiqni të bëheni tiktok, vetëm dua të shoh fotografi të miqve të mi”.
Njerëzit e përdorin këtë platformë për kontakte me miqtë e familjen.
Përdoruesit po ankohen se faqja kryesore e tyre po mbushej me video të padëshiruara. Tani Instagrami ka pranuar se “ka shkuar përtej asaj që është dashur”.
Shpërthimi i TikTokut, që ka shkuar në mbi një miliard përdorues në gjithë botën, ka tunduar rrjetet sociale. Instagrami javën e shkuar vendosi që të gjitha videot të bëhen “Reels”, ngjashëm si stili i videove të TikTokut. Kjo lëvizje s’është tërhequr.
“Meta”, kompania amë e Instagramit dhe Facebookut, të mërkurën bëri të ditur për rritje 30 për qind të kohës së kaluar në “Reels”, por përjetoi për herë të parë ndër vite rënie të të hyrave.
