Një sindikatë që përfaqëson punëtorët e gjigantit të teknologjisë koreano-jugore, Samsung Electronics, u ka bërë thirrje rreth 30 mijë anëtarëve të saj që të dalin në grevë për një kohë të pacaktuar, si pjesë e kërkesave për rritje page dhe përfitime më të mira, shkruan BBC të mërkurën.
Njoftimi erdhi në ditën e fundit të grevës së përgjithshme tre-ditore të mbajtur nga Unioni Kombëtar i Samsung Electronics (NSEU).
Sindikata ka thënë se kishte marrë vendimin pasi menaxhmenti nuk tregoi synim për të zhvilluar bisedime mbi kërkesat e tyre.
NSEU, e cila përfaqëson gati një të katërtën e punëtorëve të Samsung Electronics në Korenë e Jugut, ka thënë se greva ka ndërprerë prodhimin. Samsungu i ka kundërshtuar këto pretendime.
“Samsung Electronics do të sigurojë që të mos ketë ndërprerje në linjat e prodhimit. Kompania mbetet e përkushtuar për t'u angazhuar në negociata të mirëbesimit me sindikatat”, ka thënë kompania.
Megjithatë, sipas sindikatës, “kompania nuk ka ndërmend të angazhohet në dialog edhe pas grevës së parë të përgjithshme, kështu që ne shpallim grevë të dytë të përgjithshme duke filluar nga 10 korriku, me kohëzgjatje të pacaktuar”.
NSEU ka thënë se rreth 6.500 punëtorë kanë marrë pjesë në grevë deri më tani.
