Hendbollistet e Istogut dhe ato të Vushtrrisë luajtën ndeshje të madhe.
Por në finale të Kupës së Kosovës në hendboll ka kaluar skuadra e Istogut që e fitoi ndeshjen dramatike me një gol dallim, 31:30.
Sfida u vendos në aksionin e fundit. Fillimisht, vushtrriaset nuk i konkretizuan në gol dy aksionet e fundit dhe istogaset fituan me një gol dallim.
Finalet e Kupës do të luhen të dielën, ndërsa turneu organizohet në Ferizaj, përkatësisht në palestrën “Bill Clinton”.
Astou Ndiaye ishte më e dalluara te Istogu me dhjetë gola, ndërsa me shtatë gola në fitore kontribuoi Paulo Sebastiao Suca. Nga katër gola i patën Suzana Ujkiq dhe Nihed Limem.
Vushtrrisë ndërkohë nuk i ndihmuan 12 golat e Sevdanur Ozkan, dhe as pesë golat e realizuara nga Burneta Rama e Gentiana Basholli.
Në finale, Istogu luan me fituesin e ndeshjes Samadrexha – Ferizaj.
