Krasniqi e Rrahmani, më të mirët e KOHËS

Prishtinë, 27 dhjetor – Sportistët e Kosovës kishin goxha plane për këtë vit. Synimi i yjeve ishte që nga Lojërat Olimpike të ktheheshin edhe me ndonjë medalje. Por pandemia e koronavirusit ua prishi planet. Atyre, megjithatë, nuk u kanë munguar sukseset.

Me plot sukses, ndonëse me shumë telashe shkaku i COVID-19, vitin 2020 e mbylli xhudistja Distria Krasniqi. Ajo të dielën u shpall sportistja më e mirë e vitit e Grupit KOHA. Për Krasniqin është hera e parë që e fiton këtë çmim nga KOHA.

Një tjetër sportist që shquhet për punë e vullnet ka fituar çmimin e sportistit më të mirë të vitit 2020 në Kosovë. Bëhet fjalë për futbollistin e Përfaqësueses së Kosovës, Amir Rrahmani.

Ndonëse pa ceremoni të zakonshme, Krasniqi e Rrahmani morën çmimet kryesore në edicionin e 22-të të manifestimi “Sportisti i Vitit” të Grupit KOHA

KOHA, përkatësisht gazeta “Koha Ditore”, ka shpërblyer sportistin më të mirë për herë të parë në vitin 1997. Dhe, qëllimi ishte që të shpërbleheshin për mundin e tyre sportistë si Krasniqi e Rrahmani, sportistë që japin shumë mund për të dalë në piedestal, për të prezantuar veten, skuadrën, por edhe shtetin.

KOHA i është përmbajtur idesë për të shpërblyer sportistët që punojnë shumë, ndërsa ceremonia e saj tashmë vlerësohet si matësi më i mirë për sukseset e arritura nga njerëzit e sportit gjatë viteve.

Xhudistja Distria Krasniqi ka fituar të artën në Grand Slamin e Parisit, më 8 shkurt. Gara e Parisit vlerësohet më e famshmja e xhudos. Më 23 tetor fitoi të artën edhe në Grand Slamin e Budapestit. Ndërkohë, më 19 nëntor fitoi medaljen e bronztë në Kampionatin Evropian për seniorë. Fitoi në luftën e parë ndaj Aisha Gurbanli të Azerbajxhanit. Më pas e mposhti francezja Shirine Boukli, kurse në luftën e tretë e mundi rusen Irina Dolgova. Për medalje të bronztë fitoi ndaj francezes Melanie Clement. Garoi në kategorinë deri 48 kilogramë. Distria Krasniqi është e para në ranglistën olimpike në kategorinë deri 48 kilogramë.

“Edhe pse ka qenë një vit i vështirë jo vetëm për mua, por për të gjithë sportistët, në të gjitha garat që kam shkuar, jam kthyer me medalje. Kam filluar shumë mirë me Grand Slamin e Parisit, ku kam bërë gara në një kategori tjetër dhe kam marrë medaljen e artë. Pastaj ka qenë më vështirë pasi ishim të mbyllur, por stërvitjet nuk janë ndalur. Jam përgatitur dhe kam marrë medalje në Grand Slamin e Budapestit, ndërsa tash së fundmi në Kampionatin e Evropës”, ka thënë Krasniqi.

 Kuka vazhdon me çmime

Trajneri i Krasniqit, Driton Kuka, është shpallur punëtor sportiv i vitit.

Ndërkohë, Përfaqësuesja e Kosovës në vitin 2020 kishte një lider në fushë – Amir Rrahmanin. Mbrojtësi i Kosovës gjatë këtij viti i luajti 20 ndeshje në Serie A me Veronën. Në janar firmosi me Napolin, por mbeti te Verona si huazim. Te Verona ka shfaqur stabilitet në mbrojtje. Por te Napoli nuk ka luajtur asnjë ndeshje zyrtare. Së fundmi ka pasur telashe me lëndime dhe me koronavirus. Për edicionin e kaluar ishte mbrojtësi me më së shumti ndërhyrje të sakta në Serie A. Për Kosovën i ka luajtur pesë ndeshje këtë vit, kurse Përfaqësuesja nuk është shquar me rezultate pozitive.

“Faleminderit shumë. Jam shumë i privilegjuar për këtë çmim që ma keni dhënë. E di që nuk është lehtë, sepse ka shumë lojtarë në Evropë që luajnë, shokë të mi, bashkëlojtarë të mi, dhe po ndihem shumë i privilegjuar dhe i veçantë për këtë arritje. Falënderoj gjithë jurinë që më ka votuar dhe shpresoj që edhe në vitet e tjera të bëjmë lojëra më të mira dhe shpresoj që të bëjmë sa më mirë vitet e ardhshme”, ka thënë Rrahmani.

Te klubet, më i miri i meshkujve është shpallur Drita (futboll), që fitoi titullin e kampionit, ndërsa te femrat klubi më i mirë u shpall ai i hendbollit, Istogu. Istogu ka mbetur pa trofe këtë edicion, por ishte skuadra e vetme e femrave me fitore në arenën ndërkombëtare. Në raundin e dytë të Kupës Evropiane e eliminoi Vushtrrinë. Në raundin e tretë të Kupës Evropiane, Istogu u përball me skuadrën bjelloruse Victoria-Berestie. Ndeshjen e parë e fitoi 33:30, por të dytën e humbi 32:28 dhe nuk mundi të avancojë tutje.

“Faleminderit shumë për vlerësimin profesional të Grupit KOHA. Ishte një vit i mrekullueshëm gjatë pandemisë. Më meritorët për këtë sukses normalisht që janë lojtarët dhe gjithë stafi i Dritës. Shpresojmë që në vitin e ardhshëm të jemi edhe më të fortë. Faleminderit shumë”, ka thënë zyrtari i Dritës, Ilaz Shkodra.

KOHA nderon kryetarin e parë të FFK-së

Mirënjohja “Post Mortem” i është ndarë kryetarit të parë të Federatës së Futbollit të Kosovës (FFK), Agim Bytyçi, që vlerësohet se ka dhënë kontribut të madh në zhvillimin e futbollit.

Xhudoja ka merituar një çmim edhe te të rinjtë. Laura Fazliu edhe këtë vit është shpallur sportistja më e mirë e re e vitit. Si Fazliu, për herë të dytë fitoi edhe atleti Muhamet Ramadani. Ramadanit i takoi çmimi “Sportisti më i mirë i ri i vitit”.

“Pas gjithë kësaj situate që kemi pasur në kohën e pandemisë, ne kemi ushtruar vazhdimisht. Medaljet kanë qenë sukses për mua, edhe pse kam pritur që të bëhem kampione e Evropës, por fati nuk e deshi që medalja e artë të vijë tek unë. Shpresoj që të vazhdoj kështu me suksese sa më të mira. Caku im për vitin tjetër është që të punoj sa më shumë, pse jo edhe ta fitoj normën Olimpike që t’i bashkëngjitem edhe unë ekipit olimpik”, ka thënë Fazliu.

Fazliu ka fituar dy medalje nga kampionatet evropiane të këtij viti në xhudo.

Falënderues është shprehur edhe Ramadani. Ai ka falënderuar Grupin KOHA dhe ka premtuar suksese edhe në vitin tjetër. Gjatë vitit 2020, Ramadani ka fituar dy medalje të arta në kampionatet ballkanike në grupmoshën U20.

Më 9 shkurt në Kampionatin e Katërt Ballkanik të atletikës në palestër, fitoi në disiplinën e hedhjes së gjyles me rezultat 19.20 metra.

Grupi KOHA ka formuar çmimin “Majlinda Kelmendi” për kontributin e saj për vendin dhe për arritjet në sport. Për këtë vit KOHA ka vendosur që çmimi “Majlinda Kelmendi” t’i jepet Enis Xhemailit për inspirim në sport. Njëjtë si Majlinda, Enisi i frymëzon të rinjtë që të merren me sport.

Mirënjohjet për vepër jetësore KOHA vendosi t’ua ndajë dy doajenëve të gazetarisë sportive, Gani Kosumit dhe Xhavit Kajtazit.

Ndonëse në pandemi, KOHA vendosi të shpallë më të mirët e vitit në sport. Kështu, tradita më e gjatë e shpalljes së më të mirëve të vitit vazhdon.

*************

Fituesit e vitit 2020

Sportistja më e mirë e re e vitit

Laura Fazliu (xhudo)

Sportisti më i mirë i ri i vitit

Muhamet Ramadani (atletikë)

Post Mortem

Agim Bytyçi

Çmimi “Majlinda Kelmendi”

Enis Xhemaili

Klubi më i mirë i vitit – femrat

Istogu (hendboll)

Klubi më i mirë i vitit - meshkujt

Drita (futboll)

Mirënjohje për vepër jetësore

Gani Kosumi

Xhavit Kajtazi

Punëtori Sportiv i vitit

Driton Kuka

Sportisti më i mirë i vitit

Amir Rrahmani (futboll)

Sportistja më e mirë e vitit

Distria Krasniqi (xhudo)

*****

Fituesit e deritashëm

1997 - Zijadin Kryeziu

2000 - Besnik Hasi

2001 - Kushtrim Munishi

2002 - Luan Krasniqi

2003 - Afrim Latifi - Kaltrinë Krasniqi

2004 - Luan Krasniqi - Besire Domaniku

2005 - Luan Krasniqi - Majlinda Kelmendi

2006 - Habib Ademi - Daulina Osmani

2007 - Arben Muqolli - Majlinda Kelmendi

2008 - Visar Berisha - Majlinda Kelmendi

2009 - Majlinda Kelmendi

2010 - Majlinda Kelmendi

2011 - Majlinda Kelmendi

2012 - Nora Gjakova - Shpëtim Idrizi

2013 - Nora Gjakova - Dardan Berisha

2014 - Nora Gjakova - Dardan Berisha

2015 - Nora Gjakova - Dardan Berisha

2016 - Nora Gjakova - Herolind Nishevci

2017 - Nora Gjakova - Dardan Berisha

2018 – Nora Gjakova – Akil Gjakova

2019 – Loriana Kuka – Vedat Muriqi

2020 – Distria Krasniqi – Amir Rrahmani