Manchester City në fundjavë mund të bëjë hap vendimtar drejt titullit të tretë rresht në Premier League.
City të shtunën prej orën 16:00 luan në shtëpi kundër Leeds Unitedit, në kuadër të xhiros së 35-të të elitës së futbollit anglez.
City është i pari në tabelë me 79 pikë, një më shumë se Arsenali. “Qytetarët” e drejtuar nga Pep Guardiola e kanë edhe një ndeshje më pak të zhvilluar.
Skuadra e Leedsit udhëhiqet nga trajneri veteran, Sam Allardyce, i cili do të mundohet t’i prishë punë Cityt, që i ka fituar nëntë ndeshjet e fundit të ligës.
Allerdyce, 68-vjeçar, ka vetëm katër ndeshje për ta mbajtur në elitë Leedsin dhe të fitojë rreth tre milionë euro.
Allardyce erdhi në vend të Javi Garcias, i cili në pesë ndeshje mori vetëm një pikë, ndërsa Leedsi pranoi 18 gola. Leedsi është i 17-ti me 30 pikë, sa i kanë edhe Leicesteri dhe Nottinghami.
Skuadra e vendit të dytë, Arsenali, ende ka shpresa se mund ta kthejë vendin e parë në tabelë e të shpallet kampion pas një kohe të gjatë.
“Revolveristët” të dielën nga ora 17:30 luajnë në udhëtim te Newcastle United, në “St James’ Park”.
Newcastle po e kërkon daljen në Ligën e Kampionëve për herë të parë në dy dekada.
Në mënyrë që Arsenali të mbetet në garë për të triumfuar në ligë pas 19 vjetësh, duhet që ta fitojë duelin e vështirë në udhëtim te Newcastle.
E veçanta e këtij ballafaqimi është se para një edicioni dy xhiro pa përfunduar kampionati Arsenali ishte mposhtur nga Newcastle 2:0.
Si rezultat i asaj disfate, Arsenali nuk arriti në zonën “Champions”.
“Nuk e harrojmë ndeshjen që e kishim atje edicionin e kaluar. Duhet të jem i sinqertë, na shkatërruan. Ishin shumë, shumë më të mirë dhe dëshironin më shumë fitoren. Duhet të udhëtojmë e t’u tregojmë se pse jemi këtu dhe se jemi të gatshëm”, ka thënë Granit Xhaka të premten.
Newcastle i ka fituar tetë nga nëntë ndeshjet e fundit në ligë dhe është afër të përfundojnë në top-katërshe. Mban vendin e tretë me 65 pikë, dy më shumë se Manchester Unitedi i vendit të katërt.
Garë e fortë do të zhvillohet edhe për mbetje në elitë.
Skuadrat nga vendi i 16-të deri në vendin e 18-të, Leicester City, Leeds United dhe Nottingham Forest kanë nga 30 pikë.
Evertoni në pozitën e parafundit ka 29 pikë, kurse Southamptoni ka 24 pikë.
