Rita Ora në ballinën e revistës "Hunger" – Një artiste që sfidon kufijtë

“Njerëzit gjithmonë duan të të vendosin në një kornizë: ‘Je këngëtare’ apo ‘Je aktore’. Por unë kurrë nuk jam ndier rehat me këtë ide. Jeta ime në Portobello ka qenë gjithmonë një përzierje e gjithçkaje – kulturave, stileve, ideve. Pse duhet të ndalem tani, vetëm sepse jam në qendër të vëmendjes?” 

Këto janë fjalët e shqiptares me famë botërore Rita Ora, ylli i ballinës së revistës prestigjioze "Hunger" për edicionin "Fight Back". 

Revista ka shkruar se këngëtarja me origjinë nga Kosova, e rritur në Londër, vazhdon t’i sfidojë kufijtë e artit dhe të modës, duke mos iu përmbajtur rregullave të zakonshme të industrisë.
Në një rikthim simbolik në Rankin Studios, aty ku realizoi një nga ballinat e saj të para, Ora shfaqet si një artiste që nuk ndalet. 

Ajo po balancon njëkohësisht bashkëpunimin e saj të ri me brendin e veshjeve te përditshme Primark, turneun me këngëtaren Kylie Minogue, si dhe xhirimet e një projekti kinematografik me aktorin Henry Cavill.

E lindur në Notting Hill të Londrës dhe e rritur mes energjisë së një lagjeje dinamike, Ora e ka ruajtur shpirtin e saj të lirë dhe të guximshëm. Evolucioni i saj muzikor reflektohet në albumin e fundit "You & I", i cili përshkruan marrëdhënien e saj me regjisorin Taika Waititi. Pavarësisht projekteve në muzikë, film dhe modë, ajo vazhdon të mbetet po e njëjta vajzë energjike që theu kufijtë me hitin e saj të parë "Hot Right Now".

"Kjo jam unë", ka thënë ajo me vetëbesim, duke treguar se nuk ka më nevojë të shpjegojë veten.

Ora shfaqet në këtë ballinë e veshur me koleksionin më të ri të Primark, duke shpërfaqur stilin e saj si rebele dhe autentike.