Pitt arrin “fitore” në njërën nga përballjet gjyqësore me Jolien

Beteja ligjore mes të aktorit, Brad Pitt dhe ish-bashkëshortes së tij, aktores Angelina Jolie për pronësinë e tyre të përbashkët të vreshtit francez “Château Miraval”, ka marrë një kthesë të rëndësishme. 

Një gjykatës ka hedhur poshtë kërkesën e Joliet për hedhjen poshtë të padisë së Pittit, duke mundësuar që çështja të shkojë përpara në gjyq, ka shkruar The New York Post.

Padia e Pittit, të cilën ai e ka paraqitur në vitin 2022, pretendon se Jolie ka shkelur marrëveshjen gojore mes tyre lidhur me shitjen e aksioneve të vreshtit në fjalë. Sipas Pittit, kjo marrëveshje thoshte se asnjë nga palët nuk mund t’i shiste aksionet e tij te një palë e tretë pa e ofruar më parë mundësinë për t'i blerë tjetri. Ai pretendon se Jolie ka shkelur këtë marrëveshje kur ka shitur aksionet e saj tek “Stoli Group” në vitin 2021, pa ia ofruar atij mundësinë për t'i blerë.

Nga ana e saj, Jolie ka thënë se ka tentuar t'ia ofrojë aksionet Pitt, por ai ka refuzuar të flasë nëse ajo nuk nënshkruante një marrëveshje për mosshpalosje të rastit. Ajo pretendon se ky propozim kishte për qëllim t’i mbulonte akuzat për abuzim që ajo pretendon se i ka përjetuar gjatë martesës. 

Ekipi ligjor i Pittit e mohon akuzën për abuzim dhe thotë se ri-negocimi i kushteve të shitjes ka bërë që marrëveshja e mëparshme të humbasë vlefshmërinë.

Vendimi i gjykatës për të refuzuar kërkesën e Joliet për të hedhur poshtë padinë e Pittit tregon se gjykata ka besim që ka bazë në pretendimet e Pittit që marrëveshja gojore vazhdon të vlejë. Ky hap ka hapur rrugën për një gjyq të plotë, ku mund të shqyrtohen më shumë detajet e grindjes për vreshtin dhe akuzat për abuzim.

Një burim i afërt me çështjen ka thënë për New York Post se kjo gjë është një lloj fitore e rëndësishme për Pittin.

“Kjo është një grindje biznesi e thjeshtë, por pala tjetër ka futur vazhdimisht elemente personale, të cilat kanë ekspozuar dobësitë e çështjes dhe kanë komplikuar dhe zgjatur procedurat”, ka thënë burimi.

Përveç grindjes për vreshtin, ata janë gjithashtu të përfshirë në një betejë të ashpër për kujdestarinë e gjashtë fëmijëve të tyre. 

Është raportuar se Pitt nuk ka pasur “asnjë kontakt” me binjakët e tyre 15-vjeçarë, Knox dhe Vivienne. Po ashtu, vajza e tyre 18-vjeçare, Shiloh, ka vendosur të mos përdorë më mbiemrin e Pitt, duke ndjekur  hapat e vajzës së tyre 19-vjeçare, Zahara.

Jolie ka kërkuar publikisht që Pitt të ndalojë luftën ligjore për të mirën e fëmijëve të tyre, duke e inkurajuar të ndalojë procesin. 

Sidoqoftë, burimi ka thënë se në fakt është Jolie ajo që po përpiqet të përdorë familjen për të fituar përfitime në këtë grindje.

Çështja tani po ecën përpara dhe do të kërkojë një vendim nga gjykata përfundimisht, ndërkohë që dyshja vazhdon të përballet me një mori problemesh ligjore dhe personale.