Kate Hudson: Të jesh nënë do të thotë të mësosh si t'i lësh fëmijët të lirë

"Mësoni të lini të lirë fëmijët tuaj" është mesazhi që ka aktorja Kate Hudson për të gjitha nënat. 

Sipas saj, kur i ke rritur fëmijë me dashuri dhe përkushtim, s’mund të presësh më asgjë prej tyre, përveçse t’i lejosh të jetojnë jetën e tyre.

Në një intervistë për podkastin “Not Gonna Lie”, Hudson, 46 vjeçe, e cila është nënë e tre fëmijëve, ka  folur për marrëdhënien me djalin e saj të madh, ka raportuar FemaleFirst.

“Ryder është 21 vjeç dhe unë isha shumë e re kur e linda. Disi jemi rritur bashkë. Dhe tani ai më sheh mua, jo vetëm si nënë, por si njeri. Një ditë më tha: ‘Je mirë? Je shumë e ngarkuar. A po kujdesesh për veten?’ Dhe aty kuptova se përkushtimi që i kam dhënë, po më kthehet mbrapsht. Ai po më jep mua atë që unë i dhashë dikur”, ka thënë aktorja.

Por Hudson ka theksuar se ky “shkëmbim dashurie” ndodh vetëm kur nuk i kontrollon fëmijët.

“Gjithçka që do t’i thosha një nëne është: liroje fëmijën. Lëre të shkojë. Mos i qëndro pas. Mos prit asgjë”, ka shtuar ylli.

Ajo pranon se kjo nuk është gjithmonë e lehtë, sidomos kur ndihesh e lidhur fort me ta. Por vendosmëria për t’i lejuar të jenë vetvetja, sipas saj, është çelësi.

“Nëse i mban shumë nën kontroll, do t’i largosh. Do t’i çmendësh. Do të ikin me vrap. Prandaj, lëri t’i gëzohen jetës së tyre”, ka thënë ndër të tjera artistja.

Hudson i kujtoi bashkëbisedueses Kylie Kelce, e cila ka pesë fëmijë me futbollistin Jason Kelce, se ndonëse fëmijët mund të mos të telefonojnë për disa ditë, “kur të kenë nevojë për ty, do të të kërkojnë vetë”.