Mijëra fansa të grupit BTS, do të mblidhen në Seul të enjten për një përqafim nga Jini, i cili është rikthyer në rolin e tij si artist i K-popit, pas 18 muajve në shërbim ushtarak, raporton “BBC”.
Kjo maratonë triorëshe, do të jetë ngjarja e tij e parë publike që pas përfundimit të shërbimit ushtarak të mërkurën.
1000 adhurues, që do të përqafohen janë përzgjedhur me anë të një lotarie – edhe pse Jini ka thënë se ka sugjeruar të përqafonte deri në 3000 fansa.
“Jam shumë e lumtur që do ta takoj Jinin”, thotë Park, e cila ka mësuar javën e kaluar se ka fituar lotarinë për “maratonën e përqafimeve”. “Nuk e kam pritur fitoren. Nuk mund ta besoja prandaj kam qëndruar tërë fundjavën duke e shikuar kohë pas kohe”, thotë 32-vjeçarja.
Ajo ka thënë që kjo ndodhi ka filluar “t’i dukej e vërtetë”, në momentin që ka nisur të bëhej gati për të shkuar në kryeqytet.
Jini, 31-vjeçar, i cili është anëtari më i vjetër i grupit muzikor, shkoi në shërbim ushtarak në dhjetor të vitit 2022. Ai ka shërbyer si ndihmësinstruktor i stërvitjes, në një qendër trajnimi për ushtrinë e Koresë së Jugut. Në Kore të Jugut shërbimi ushtarak është i detyrueshëm.
Jini është pjesëtari i parë i BTS-it, që përfundon shërbimin ushtarak. Gjashtë të tjerët - J-Hope, V, RM, Jimin, Jung Kook dhe Suga - janë duke shërbyer akoma dhe grupi pritet të ribashkohet në qershor të vitit 2025.
Në rikthimin e tij, ai ka hyrë në transmetim të drejtpërdrejtë ku ka folur me fansat e tij: “Faleminderit që më pritët, ju dua. Do përpiqem t’i shpreh emocionet e mia nesër”.
Park është si e emocionuar, ashtu edhe e shqetësuar.
“Përqafimi i mijëra njerëzve për tri orë është i vështirë edhe nëse Jin ka ushtruar në ushtri”, thotë ajo.
Ngjarja ka nxitur reagime për rregullat e kualifikimit, që u kanë kërkuar fansave të bëhen pjesë e ARMY-t, e cila ka më shumë se 25 milionë anëtarë. Ata gjithashtu duhet të blinin albume të BTS-it në uebfaqe për t’u futur në lojë – sa më shumë albume, aq më e lartë mundësia për t’u përqafuar.
Kështu fansat e kanë akuzuar menaxhmentin e grupit, HYBE, se e ka përdorur ngjarjen për t’i shitur albumet e pashitura. Agjencia në fund ka kërkuar falje, duke e ulur kriterin që t’i lejojë të gjithë blerësit e albumeve të bëhen pjesë e lojës.
Jini e ka adresuar këtë në transmetimin e së mërkurës: “Kjo është diçka që unë dhe kompania e kemi përgatitur për qëllime të mira, prandaj ju lutem na kuptoni”.
Për fansat, rikthimi i Jinit është gjithashtu fillimi i rikthimit të BTS-it, nga pauza. Por, pyetja e industrisë është se a do të jetë grupi më i famshëm në botë, i suksesshëm pas pauzës?
