Alec Baldwin flet për pendimin më të madh rreth divorcit me Kim Basingerin

Alec Baldwin ka pranuar se ndien keqardhje për ndikimin negativ që shkurorëzimi nga Kim Basingeri pati te vajza e tyre, Ireland Baldwin. 

66-vjeçi ka thënë se tani synon të ruajë një marrëdhënie të mirë me familjen e tij.

Baldwin dhe Basinger, të dy yje të Hollywoodit, u ndanë në vitin 2002, pas pothuajse një dekade martesë. Ai e përshkroi periudhën si përvojë “të vështirë dhe të lodhshme”, veçanërisht për shkak të betejës së gjatë për kujdestarinë e Irelandit.

“Marrëdhënia ime me vajzën time u ndikua shumë negativisht nga divorci me nënën e saj. Beteja për kujdestarinë zgjati shtatë vjet dhe mediat e kthyen gjithçka në një spektakël. Ishte një çmenduri e vërtetë dhe diçka shumë e vështirë për mua”, ka thënë aktori në episodin e ri të reality showt të tij, “The Baldwins”, ka raportuar FemaleFirst.

Ai ka shtuar se një nga pendesat më të mëdha të tij është ndikimi që ky proces pati te Ireland, e cila sot është 29 vjeç.

Sot, Baldwin është i martuar me Hilaria Hayward-Thomas, 41 vjeçare, me të cilën ka shtatë fëmijë: Carmen 11 vjeç, Rafael 9 vjeç, Leonardo 8 vjeç, Romeo 6 vjeç, binjakët Edu dhe Maria 4 vjeç dhe Ilaria 2 vjeç.

Ai ka shpjeguar se marrëdhënia mes Irelandit dhe motrave e vëllezërve të saj është shumë e mirë, por gjithsesi ajo është në një fazë tjetër të jetës së saj.

“Ajo i do shumë fëmijët dhe është shumë e ëmbël me ta, por nuk është pjesë e grupit të tyre të ngushtë. Kjo është arsyeja pse dua të kem një marrëdhënie të fortë me Carmen, sepse po përjetoj të qenit baba i një vajze sërish nga fillimi”, ka thënë Baldwin.

Komentet e Baldwinit vijnë vetëm pak ditë pasi Kim Basinger deklaroi se ajo dhe ish-bashkëshorti ruajnë marrëdhënie të mirë, më shumë se 20 vjet pas divorcit.

“Unë dhe Alec kemi një marrëdhënie shumë të mirë. E respektoj për atë që është sot dhe për familjen e tij. Nuk i kalojmë bashkë festat dhe nuk takohemi shpesh, por flasim herë pas here”, ka thënë aktorja në një intervistë për Variety.

Ajo ka shtuar se ai e telefonon dhe kane marrëdhënie vërtet të sinqertë dhe të përzemërt.

“Sepse, në fund të fundit, kemi një vajzë dhe nuk i uroj asgjë tjetër përveç të mirave”, ka thënë Basinger.