50 Centi sërish godet P.Diddyn

Televizioni “Revolt” është bërë arsyeja që reperi 50 Cent ta thumbojë sërish homologun Sean Combs, të njohur me emrin artistik P.Diddy.

P.Diddy është tërhequr nga drejtimi i televizionit amerikan për muzikë, “Revolt”, pas tri padive për sulm seksual, abuzim dhe trafikim. E këtë e ka shfrytëzuar 50 Centi, që po dëshiron ta blejë televizionin, raporton “Billboard”.

“Unë do ta blej atë nga ju ‘play boy’, për një çmim të ulët sepse ‘Cadillac’ dhe ‘AT&T’ do të tërhiqen. Do t'i jap disa dollarë tani për të! Ma shit, pastaj mund të bëhemi miq... E kam seriozisht më kontakto në telefonin tim”, ka shkruar 50 Cent në X, njohur më parë si Twitter, mbi titujt e mediumeve që raportuan se P.Diddy po tërhiqet nga “Revolt TV”.

Deklarata e 50 Centit vjen pasi televizioni kishte bërë komunikatë zyrtare në Instagram për tërheqjen e P.Diddyt.

“Ndërsa Combsi nuk ka pasur asnjë rol operacional apo të përditshëm në biznes, ky vendim ndihmon që ‘REVOLT’ të mbetet i përqendruar në mënyrë të palëkundur në misionin për të krijuar përmbajtje kuptimplote për kulturën dhe për të amplifikuar zërat e të gjithë racës së zezë në të gjithë vendin dhe diasporën afrikane”, thuhet në deklaratën e televizionit.

Kjo nuk është hera e parë që 50 Centi komenton problemet publike të P.Diddyt.

Të hënën, reperi postoi pamje nga “Screamfest 2007” në llogarinë e tij në X, ku shihet P.Diddy duke e goditur në prapanicë reperin e njohur, Jay-Z.

“...Jo, nuk e kam qenë kurrë pro këtyre gjërave”, ka shkruar 50 Cent.

VIDEO:

Gjatë këtij muaji, P.Diddy është paditur nga ish-e dashura e tij, këngëtarja Cassie, që e akuzoi për dhunë seksuale, abuzim, dhe trafikim. Pas saj, në adresë të reperit erdhën edhe dy padi të tjera për po të njëjtat çështje.