-
Përgatiti:
Vita Abrashi-Kajtazi
- 26 shtator 2024 10:50
- Shpërndaje në:
Gjigandi transmetues, Netflix, është duke prodhuar një dokumentar nga reperi 50 Cent, me pretendime për abuzim dekadësh që ka bërë reperi tashmë i arrestuar, Sean Combs i njohur si P.Diddy.
50 Cent, i cili ka akuzuar P.Diddyn dhe ka bërë shaka të ndryshme përmes postimeve në rrjete sociale, qysh kur i arrestuari mori padinë e parë, nga ish - e dashura e tij për 10 vjet, këngëtarja Cassanda Ventuar, e njohur si Cassie, po bashkëpunon me Alexanda Stapleton, e cila është duke bërë regjinë e dokumentarit, shkruan Variety.
“Kjo është një histori që do të ketë ndikim njerëzor. Është narrativë që ngërthen në vete dekada, jo vetëm tituj mediash e video që janë parë deri më tani”, kanë thënë ata në një deklaratë të përbashkët për Variety.
Ata kanë shtuar se janë duke u përkushtuar, që bashkërisht, të u japin zë atyre që nuk kanë dhe të paraqesim diçka shumë të veçantë.
“Ndërkohë që pretendimet janë tronditëse, ju bëjmë thirrje të gjithëve që të kujtojnë se historia e Sean Combsit nuk është krejt historia e hip-hopit e kulturës. Kemi për qëllim që të ju sigurojmë se veprimet individuale nuk mund t’i lënë nën hije kontributet që kanë bërë njerëzit e kulturës ndër vite”, thuhet ne deklaratë.
50 Cent, në dhjetorin e kaluar, pati thënë se G-Unit do të ishte producent i serive të dokumentarit për P.Diddyn, për të cilin, atëherë veçse kishin filluar paditë e njëpasnjëshme.
Kjo është hera e parë që platforma Netflix konfirmon që është e përfshirë në krijimin e këtij dokumentari, pavarësisht që 50 Cent, në muajin korrik e kishte diskutuar zhvillimin e projektit me The Hollywood Reporter.
Në atë kohë, 50 Cent kishte ndarë një video në rrjetin social “X”, e cila tregonte reperin e labelit “Bad Boy Records”, Marc Curry, duke thënë se Combs së pari fuste drogë nëpër shishet e shampanjës para se të fillonin t’i pinin gratë që merrnin pjesë në festa.
Producenti e reperi ka thënë se ky dokumentar ka për qëllim mbështetjen e viktimave të sulmeve seksuale.
Javën e kaluar, Combs është arrestuar nën akuzat për shantazh, mashtrim, trafikim seksual e prostitucion, ndërkohë që është deklaruar i pafajshëm ndaj akuzave lirimi me kusht i është mohuar dy herë.
