Notarja Hana Beiqi do të thyejë një rekord të Kosovës në Lojërat Olimpike që të premten nisin në Paris. Me 15 vjet, 10 muaj e gjashtë ditë, Hana do të bëhet garuesja më e re që garon në Lojrat Olimpike për Kosovën.
“Jam në dijeni dhe është ndjenjë shumë e mirë të kem përkrah edhe sportiste të nivelit të lart, sidomos fituese të medaljeve të arta olimpike të xhudos. Shpresoj një ditë të jem edhe unë si ato”, ka thënë Beiqi për faqen zyrtare të Komitetit Olimpik të Kosovës.
Beiqi më 3 gusht do ta përfaqësojë Kosovën në disiplinën 50 metra stil i lirë. Kosova në Olimpiadën e Parisit, që zhvillohet deri më 11 gusht, merr pjesë me nëntë sportistë, gjashtë me normë dhe tre me ftesë.
Krahas Beiqit, në not paraqitet edhe Adell Shaboviq në 100 metra stil i lirë.
