Trendët në Tiktok dhe media të tjera sociale rritin numrin e krimeve

Ashtu si shumë platforma sociale, TikToku shfaq përmbajtjen me një kombinim të inteligjencës artificiale dhe moderatorëve njerëzorë të cilët përpiqen të kapin çdo gjë që mund të humbasë një AI. Një zëdhënës tjetër ka sqaruar se është më e lehtë për teknologjinë të dallojë disa shkelje, si lakuriqësia, sesa gjëra të tilla si adoleshentët që hyjnë në makina

Kia e Jonnifer Nealit u vodh dy herë brenda një dite - fillimisht përpara shtëpisë së saj në Çikago dhe më vonë jashtë dyqanit të mekanikës ku e çoi për ta rregulluar.

Por sprova e Nealit nuk mbaroi këtu. Pasi makina e saj u gjet një muaj më vonë, ajo u ndalua nga policia dy herë duke u kthyer nga puna, sepse një gabim i policisë bëri që Optima të mbetej e regjistruar si e vjedhur. I njëjti gabim rezultoi që policët e zgjuan atë në orën 3 të mëngjesit të një nate tjetër. Në një rast tjetër, një tufë zyrtarësh policie e tërhoqën atë ndërsa po udhëtonte për në Misisipi, duke e vënë në pranga.

Kia tani qëndron në garazhin e saj.

“Kanë kaluar disa muaj, por sinqerisht unë jam ende e nervozuar”, ka treguar Neal.

Historia e Nealit është një nga mijëra, nga pronarët e Kias dhe Hyundait në të gjithë vendin, makinat e të cilëve janë vjedhur ose dëmtuar në dy vitet e fundit.

Krimi i performancës

Rritja e mprehtë është lidhur me videot virale, të postuara në TikTok dhe platforma të tjera të mediave sociale, duke u mësuar njerëzve se si të ndezin makinat me kabllo USB dhe të shfrytëzojnë një cenueshmëri sigurie në disa modele të shitura në SHBA pa imobilizues motori, një veçori standarde në shumicën makina që nga vitet 1990 duke parandaluar ndezjen e motorit nëse nuk është i pranishëm çelësi.

Por ndryshe nga disa trendë në media sociale që u zhdukën pikërisht pasi policia i kontrolloi ato, vjedhjet e makinave kanë vazhduar. Hyundai është përpjekur të punojë me TikTokun dhe platforma të tjera për të hequr videot, por ndërsa të priten përparime, ndodhin valë të reja vjedhjesh, duke ilustruar efektet e vazhdueshme të përmbajtjes së rrezikshme që fiton tërheqje tek adoleshentët që kërkojnë mënyra për t'u bërë virale.

Është një fenomen i njohur si krimi i performancës. Departamentet e policisë në shumë qytete kanë thënë se kjo ndikon në një rritje që ata kanë parë te të miturit e arrestuar ose të akuzuar për vjedhje makinash. Megjithatë, ekspertët e kriminologjisë paralajmërojnë se roli që luajnë adoleshentët në rritjen e vjedhjeve - që filloi gjatë pandemisë dhe nuk kufizohet vetëm në Kia dhe Hyundai - mund të fryhet artificialisht sepse adoleshentët pa përvojë në krim kanë më shumë gjasa të kapen.

Prokurorët e përgjithshëm nga 17 shtete u kanë bërë thirrje rregullatorëve federalë të lëshojnë një tërheqje të detyrueshme, duke argumentuar se rregullimet vullnetare të softuerit të lëshuara nga kompanitë nuk janë të mjaftueshme. Qytete të shumta, duke përfshirë Baltimoren, Milwaukee dhe Nju Jorkun, kanë paraqitur ose njoftuar plane për t'u bashkuar me veprimet ligjore kundër prodhuesve të automjeteve, të cilët gjithashtu po përballen me padi të përgjithshme dhe civile nga konsumatorët sikurse Neal. Një padi e tillë u zgjidh për rreth 200 milionë dollarë javën e kaluar.

Administrata Kombëtare e Autostradave dhe Sigurisë fajëson trendin për të paktën 14 aksidente dhe tetë vdekje, por avokatët që paditin prodhuesit e makinave thonë se numri ka të ngjarë shumë më i lartë.

Morgan Kornfeind po udhëtonte me makinë për në një klasë joga në Portland, Oregon, në fund të marsit, kur një burrë me një Kia të vjedhur pothuajse e shkeli teksa po ngiste në drejtimin e gabuar duke ikur nga policia. 25-vjeçarja ka pësuar plagë, thyerje kockash dhe lëndime të shumta në këmbë. Ajo kishte nevojë për operacion dhe merr pjesë në takime të shumta mjekësore çdo javë.

“Unë nuk jam në gjendje të punoj punën time që e dua shumë. Nuk jam në gjendje të praktikoj joga ose të eci me qentë e mi. Kam humbur udhëtimet e planifikuara me miqtë për shkak të rehabilitimit tim të vazhdueshëm. Ideja për të vozitur përsëri më shkakton shqetësim të madh”, shkroi ajo në një deklaratë.

Në fillim të këtij muaji në Milwaukee, një Kia e vjedhur u përplas me një autobus shkolle, duke lënë në gjendje kritike një 15-vjeçare që ishte varur nga dritarja. Policia arrestoi më vonë katër 14-vjeçarë, njëri prej të cilëve dyshohet se drejtonte makinën.

Shqetësimet e prodhuesve

Shumë nga thirrjet për llogaridhënie u janë drejtuar prodhuesve të automjeteve. MLG Attorneys at Law, firmë ligjore në Kaliforni e specializuar në paditë e defekteve të automobilave, ka marrë më shumë se 4000 kërkesa nga viktima si Kornfeind.

Por disa departamente policie, viktima dhe prodhues të automjeteve gjithashtu e drejtojnë gishtin drejt platformave të mediave sociale. Videot e postuara në YouTube javët e fundit tregojnë njerëz që hyjnë në makina të ndryshme ose përdorin një kabllo USB për t’i lidhur makinat. Kompania hoqi videot kur u njoftua nga Associated Press.

YouTube hoqi videot që përshkruanin atë që njihet si “Kia Challenge” në muajt e fundit, ka thënë zëdhënësja Elena Hernandez në një deklaratë, ndërsa theksoi se kompania merr parasysh kontekstin kur merr ato vendime.

“Ne mund të lejojmë disa video nëse ato synohen të jenë edukative, dokumentare, shkencore ose artistike”, ka shkruar Hernandez.

Në një deklaratë, një zëdhënës i TikTokut, kundërshtoi pohimet se shumë nga sfidat e rrezikshme të përmendura në raportet e lajmeve kishin arritur popullaritet masiv në platformë.

“Nuk ka asnjë provë për ndonjë nga këto sfida në TikTok dhe ka një histori të qartë të dokumentuar që shumë sfida të lidhura në mënyrë të rreme me TikTokun datojnë plotësisht para platformës”, ka thënë zëdhënësi i TikTokut, Ben Rathe.

Hany Farid, i cili u tërhoq në janar nga këshilli këshillues i përmbajtjes i TikTokut në SHBA, sepse ndihej i paaftë për të ndikuar në ndryshim, ka treguar se TikToku priret të jetë mbrojtës kur kritikohet për praktikat e tij të moderimit të përmbajtjes. Ai pranoi sfidën për të ditur se nga e kanë origjinën disa tendenca, sepse përmbajtja lëviz shpejt ndërmjet platformave.

Raporti i zbatimit i TikTok nga tre muajt e fundit të 2022 tregoi se 5% e videove që kompania hoqi ishin për shkak të veprimeve dhe sfidave të rrezikshme, me 82% të hequra brenda 24 orëve.

Ashtu si shumë platforma sociale, TikToku shfaq përmbajtjen me një kombinim të inteligjencës artificiale dhe moderatorëve njerëzorë të cilët përpiqen të kapin çdo gjë që mund të humbasë një AI. Një zëdhënës tjetër ka sqaruar se është më e lehtë për teknologjinë të dallojë disa shkelje, si lakuriqësia, sesa gjëra të tilla si adoleshentët që hyjnë në makina.

Përdoruesit gjithashtu nganjëherë shkatërrojnë kontrollet e platformës duke shkruar gabime ose duke ndryshuar fjalët në hashtags. Disa e shohin atë si një zbrazëti që meriton vëmendje. TikToku thotë se monitoron gabimet drejtshkrimore dhe shpalli si sukses përmbajtjen duke u larguar nga hashtags të zakonshëm.

Meta, e cila zotëron Facebookun dhe Instagramin, nuk iu përgjigj një kërkese për koment se si shfaq video të ngjashme.

Përktheu: Blerta Haxhiu