Aducanumab është një nga ilaçet e listës së gjerë që ka për qëllim t’i mënjanojë nga truri i pacientit depozitat e ngjitura të një proteine të quajtur aliloid beta, në një fazë fillestare të Alzhaimerit, në mënyrë që të shmangë shkatërrimet e saj, ku përfshihet humbja e kujtesës dhe e aftësisë për t’u kujdesur për veten
Washington, 7 qershor (AP) – Zyrtarët shëndetësorë në Shtetet e Bashkuara të Amerikës kanë miratuar të hënën ilaçin e parë kundër sëmundjes së Alzheimerit pas afro 20 vjetësh, duke i shpërfillur paralajmërimet nga këshilltarët e pavarur se trajtimi i debatuar nuk është dëshmuar se ka ndihmuar në ngadalësimin e avancimit të sëmundjes që shkatërron trurin.
Administrata për Ushqim dhe Barna (FDA) ka bërë të ditur se i jep miratimin ilaçit aducanumab, të zhvilluar nga Biogen, për trajtimin e pacientëve me sëmundjen e Alzheimerit.
Aducanumab është një nga ilaçet e listës së gjerë që ka për qëllim t’i mënjanojë nga truri i pacientit depozitat e ngjitura të një proteine të quajtur aliloid beta, në një fazë fillestare të Alzhaimerit, në mënyrë që të shmangë shkatërrimet e saj, ku përfshihet humbja e kujtesës dhe e aftësisë për t’u kujdesur për veten.
Është ky i vetmi bar që rregullatorët amerikanë kanë thënë se mund ta trajtojnë sëmundjen në fazën kur është ende e fshehur, e jo t’i menaxhojë simptomat si ankthi dhe pagjumësia.
Ilaçi i “Biogenit” është studiuar te pacientët që ishin në fazën fillestare të sëmundjes, ata që janë testuar pozitivë me një përbërës të pllakave amiloide të trurit. Disa pacientë që i janë nënshtruar testimit kanë përjetuar edhe fryrje potenciale të trurit.
Pas miratimit të ilaçit nga FDA-ja, “Biogen” ka vlerësuar se rreth 1.5 milionë amerikanë do të kenë të drejtë të trajtohen me aducanumab, që jepet çdo muaj nëpërmjet infuzionit, duke ngritur shqetësimet rreth kostove në sistemin e kujdesit shëndetësor.
Tri testime klinike për ilaçin, të emëruara Prime, Emerge dhe Engage, janë ndërmarrë më herët nga vetë kompania zhvilluese, para se ajo të aplikonte për miratim në FDA që më 2019 dhe në Agjencinë Evropiane për Barna (EMA) më 2020.
Sipas vlerësimeve të studiuesve, rezultatet ndryshonin vazhdimisht, “si të ishin në një slitë”. Mirëpo, në fund të fundit, një panel ekspertësh i caktuar nga FDA-ja ka konfirmuar se ilaçi mund të ishte pak i dobishëm, kështu që agjencia publike e shëndetit e kishte shtyrë procesin e analizimit të ilaçit deri në qershorin e 2021-s.
Vlerësimet e ndryshme të efikasitetit të aducanumabit ishin lidhur edhe me dozën e barit që e kishin marrë pacientët në studimet e ndryshme. Doza më e madhe kishte shkaktuar efekt më të fortë te pjesëmarrësit. Mirëpo, problemi me dozat e larta është se aducanumabi mund të shkaktojë fryrje të trurit, veçanërisht te njerëzit që kanë predispozita të caktuara gjenetike, të quajtur APOE4.
Pacientët që kanë shfaqur shenja të tilla janë larguar menjëherë nga studimi.
Mirëpo, studiuesi Christian Haas, profesor i neurodegjenerimit molekular, ka thënë më herët për gjermanen “Deutsche Welle” se efektet anësore nuk duhet të jenë arsye që të mos pranohet ilaçi.
“Mbi të gjitha, aducanumabi është një nga ilaçet që arrin ta pastrojë tërësisht patologjinë në tru”, ka theksuar Haas. Mirëpo, sipas tij, studimet duhet të vazhdojnë tutje.
Në rastet e Alzhaimerit qëllimi është që të ndërpritet e ashtuquajtura ujëvarë neurodegjenerative sa më herët që të jetë e mundur.
“Në të gjitha testimet klinike ka qenë shumë vonë për njerëzit”, ka thënë Haas.
Patologjia e Alzhaimerit zakonisht fillon 10 deri 20 vjet para se mjekët të arrijnë ta vërejnë problematikën. Por, madje edhe përparimet më të vogla mund të jenë sukses i madh në trajtimin e Alazhaimerit, ka thënë Haas.
Në të ardhmen do të jetë e rëndësishme që të fillohet trajtimi me ilaçe, kur pacientët ende nuk e kanë humbur kujtesën. Për këtë arsye mjekët po kërkojnë biomarkerë që të mund ta vërejnë më herët sëmundjen, ndonëse nuk dihet nëse do të ketë kohë që të intervenohet me antitrupat A-beta, siç është aducanumabi.
