Kokteji i “AstraZenecas” me antitrupa, i suksesshëm në trajtimin e COVID-19

Ilaçi, i cili është një koktej i dy antitrupave të quajtur AZD7442, ka zvogëluar rrezikun për COVID-19 të rëndë ose për vdekje deri në një shkallë prej 50 për qind mes pacientëve që nuk ishin shtruar në spital, por të cilët kishin simptoma për më pak se shtatë ditë, duke e përmbushur qëllimin kryesor të studimit

Një ilaç eksperimental për COVID-19 i kompanisë farmaceutike “AstraZeneca” ka ndihmuar në uljen e rrezikut për të shfaqur simptoma të rënda apo vdekjen prej sëmundjes, ka treguar të hënën një studim i fazës së vonshme i prodhuesit britanik, në atë që i shton përpjekjet e saj për zhvillimin e ilaçeve kundër koronavirusit përtej vaksinave.

Ilaçi, i cili është një koktej i dy antitrupave të quajtur AZD7442, ka zvogëluar rrezikun për COVID-19 të rëndë ose për vdekje deri në një shkallë prej 50 për qind mes pacientëve që nuk ishin shtruar në spital, por të cilët kishin simptoma për më pak se shtatë ditë, duke e përmbushur qëllimin kryesor të studimit, ka raportuar agjencia Reuters.

Terapia e “AstraZenecas”, e dhënë me anë të injektimit, është e para e këtij lloji që premton të jetë ilaç parandalues, si dhe trajtim për COVID-19, pas testimeve të shumta. Është krijuar për t’i mbrojtur njerëzit që nuk kanë reagim të fortë imunitar ndaj vaksinave.

“Këto rezultate pozitive tregojnë se një dozë e përshtatshme intramuskulare e AZD7442 mund të luajë rol të rëndësishëm në luftimin e kësaj pandemie shkatërruese”, ka thënë për Reutersin, Hugh Montgomery, studiuesi kryesor i hulumtimit.

Terapi të ngjashme, të bëra me një klasë ilaçesh të quajtura antitrupa monoklonalë, janë duke u zhvilluar nga “Regeneron” (REGN.O), “Eli Lilly” (LLY.N) dhe “GlaxoSmithKline” (GSK.L) me partnerin “Vir” (VIR.O). Këto terapi janë miratuar për përdorim emergjent në Shtetet e Bashkuara të Amerikës për trajtimin e formës së butë të COVID-19, si dhe atij të moderuar. “AstraZeneca”, vaksina e së cilës kundër COVID-19 është përdorur gjerësisht në nivel global, u kërkoi rregullatorëve amerikanë gjatë javës së kaluar që t’ia japin autorizimin e përdorimit emergjent për AZD7442 si një terapi parandaluese.

Gjiganti farmaceutik është duke ua dorëzuar rregullatorëve globalë shëndetësorë të dhënat nga studime të ndryshme për AZD7442, ka thënë një zëdhënëse të hënën.

“Do të vazhdojmë diskutimet me rregullatorët rreth këtyre të dhënave të reja”, ka thënë ajo për Reutersin, duke aluduar në rezultatet e studimit.

Studimi është zhvilluar në 13 shtete dhe ka përfshirë më shumë se 900 pjesëmarrës të rritur, rreth gjysmës së të cilëve u është dhënë AZD7442, ndërsa pjesës tjetër një ilaç qetësues.

Rezultatet e plota të studimit do të paraqiten për botim në një revistë shkencore, pas rishikimit nga kolegët, ka bërë të ditur “AstraZeneca”.

AZD7442 përmban antitrupa të prodhuar në laborator, të krijuar për të qëndruar në trup për muaj të tërë dhe për ta bllokuar virusin në rast të infeksionit.

Kurse vaksina mbështetet në një sistem imunitar të paprekur, për të zhvilluar antitrupa të shenjëzuar dhe qeliza që e luftojnë infeksionin.

“Një ndërhyrje e hershme me antitrupat tanë mund të gjenerojë reduktim të ndjeshëm të përparimit të sëmundjes së rëndë, me mbrojtje të vazhdueshme për më shumë se gjashtë muaj”, ka thënë Mene Pangalos, nënkryetar ekzekutiv në “AstraZeneca”, duke folur për Reutersin.

Ndërsa rezultatet e shpalosura të hënën e mbulojnë përdorimin e AZD7442 te pacientët që nuk janë shtruar në spital, në kuadër të një studimi të veçantë që po e studion gjithashtu përdorimin e tij si trajtim për pacientët e shtruar në spital shkaku i COVID-19.

Trajtimet e tjera të koktejeve me antitrupa për COVID-19 kanë treguar shkallë të ndryshme suksesi.

Terapia e “Regeneronit” ka shfaqur 72 për qind mbrojtje kundër infeksionit simptomatik në javën e parë dhe 93 për qind më pas. Ai i “GSK-Vir” ka gjeneruar ulje prej 79 për qind të rrezikut të shtrimit në spital ose vdekjes, përderisa terapia e “Lillyt” ka rezultuar me ulje prej 70 për qind të ngarkesës virale në ditën e shtatë të infeksionit, në krahasim me një ilaç qetësues të përdorur për studim.

Përgatiti: Liridona Bytyçi