-
Nga:
BBC
-
Përktheu:
Vita Abrashi-Kajtazi
- 1 prill 2025 23:40
- Shpërndaje në:
Një studim i kryer në Norvegji me mbi 45,000 studentë ka zbuluar se sa më shumë kohë të kalohet duke përdorur ekranin në shtrat, aq më i lartë është rreziku i pagjumësisë dhe humbje të gjumit, ka shkruar BBC.
Sipas studimit, çdo orë shtesë e kaluar duke përdorur një pajisje digjitale në shtrat rrit rrezikun e pagjumësisë me 63% dhe shkakton mesatarisht 24 minuta më pak gjumë. Megjithatë, ekspertët kanë theksuar se ky studim tregon një lidhje, por nuk provon që përdorimi i ekranit është shkaku kryesor i pagjumësisë.
A ndikon lloji i aktivitetit në ekran në cilësinë e gjumit?
Studiuesit kanë zbuluar se nuk ka dallime të mëdha mes përdorimit të rrjeteve sociale dhe aktiviteteve të tjera digjitale (si shikimi i filmave, leximi e shikimi i webfaqeve të ndryshme në internet apo lojërat).
“Problemi kryesor nuk është çfarë dikush bën, por sa kohë kalon para ekranit para gjumit”, ka thënë doktori Gunnhild Johnsen Hjetland nga Instituti Norvegjez i Shëndetit Publik, autori kryesor i studimit.
Si ndikon koha para ekranit në gjumë?
Të dhënat e mbledhura nga sondazhi norvegjez i shëndetit dhe mirëqenies (në vitin 2022) tregojnë se:
69% e pjesëmarrësve që përdorin pajisje digjitale në shtrat, kryesisht kalojnë kohë në rrjete sociale dhe aktivitete të tjera online.
Pjesëmarrësit që përdorin ekranin rregullisht para gjumit kanë më shumë gjasa të raportojnë vështirësi për të fjetur, zgjime të shpeshta gjatë natës dhe lodhje të shtuar gjatë ditës.
Ata që përjetojnë simptoma të pagjumësisë për të paktën tre netë në javë për tre muaj radhazi, identifikohen si persona me pagjumësi kronike.
Si të përmirësohet gjumi?
Duhet të shmangen pajisjet elektronike para gjumit. Ekspertët kanë sugjeruat që njerëzit të ndalojnë përdorimin e telefonit të paktën një orë para gjumit.
Krijimi i një rutine të qëndrueshme të gjumit, njerëzit duhet të përpiqen të shkojnë në shtrat e të zgjohen në të njëjtën orë çdo ditë, edhe gjatë fundjavave.
Duhet zëvendësuar ekranin me aktivitete relaksuese si leximi i një libri, bërja e një dushi të ngrohtë ose ushtrime të frymëmarrjes.
Duhet përmirësuar ambienti i gjumit, dhoma duhet të jetë e errët, e qetë dhe me temperaturë të përshtatshme.
Sipas studiuesve studime të mëtejshme do të ndihmojnë në kuptimin më të mirë të ndikimit afatgjatë të përdorimit të pajisjeve digjitale në cilësinë e gjumit.
