-
Përktheu:
Vita Abrashi-Kajtazi
- 6 janar 2025 13:12
- Shpërndaje në:
Human metapneumovirus (HMPV) është një sëmundje respiratore që shkakton simptoma të ngjashme me gripin ose ftohjen, si teshtitje, kollë dhe dhimbje fyti.
The Guardian ka shkruar se pavarësisht se ky virus shpesh kalon në mënyrë të lehtë, mund të çojë në komplikime më të rënda si bronkiti ose pneumonia, veçanërisht për ata që janë më të rrezikuar, si fëmijët, të moshuarit dhe individët me sistem të dobët imunitar.
Çfarë ka shkaktuar shqetësim për HMPV në Kinë?
Ka pasur rritje të rasteve me HMPV në veriun e Kinës, kryesisht te fëmijët. Autoritetet shëndetësore atje kanë pranuar këtë rritje, por kanë siguruar qytetarët se rastet duket se janë më të lehta se vitin e kaluar. Qendra për Kontrollin e Sëmundjeve në Kinë (CDC) ka kërkuar që njerëzit të mbajnë praktika të mira higjiene, por ka mohuar frikën për spitale të mbingarkuara dhe një pandemi të ngjashme me Covid-in.
Një pjesë e rritjes së rasteve thuhet se po ndodh për shkak të teknologjisë së përmirësuar, e cila ndihmon në identifikimin e rasteve me HMPV.
“Ne tani jemi më të kujdesshëm për shpërthimet, dhe kur dëgjojmë për një virus si HMPV, duket shumë shqetësues”, ka thënë doktoresha Jacqueline Stephens, eksperte në shëndetin publik.
Sa serioz është HMPV?
Simptomat e HMPV janë të ngjashme me ato të gripit ose ftohjes, dhe zakonisht kalojnë pas disa ditësh pushimi.
Sidoqoftë, për ata që janë më të rrezikuar, si të moshuarit dhe ata me imunitet të dobët, HMPV mund të çojë në sëmundje më të rënda si bronkiti ose pneumonia.
Profesori Paul Griffin, drejtor i shërbimeve të sëmundjeve infektive në Brisbane, ka thënë se “është e rëndësishme që njerëzit të dinë që HMPV është një virus që mund të shkaktojë sëmundje të rënda, veçanërisht për ata që janë më të rrezikuar”.
Për fat të keq, aktualisht nuk ka asnjë vaksinë ose trajtim antiviral për HMPV, por disa vaksina janë në zhvillim.
A është HMPV një kërcënim si Covid-19?
Ekspertët theksojnë se HMPV nuk është një virus i ri si Covid-19, i cili shkaktoi pandemi globale.
HMPV ka ekzistuar që nga vitit 2001 dhe ekziston një nivel imuniteti në popullatë për shkak të infeksioneve të mëparshme. Pra, edhe pse rritja e rasteve është e rëndësishme, nuk pritet të shkaktojë një pandemi të ngjashme me Covid-19.
“Nuk mendoj se duhet të jemi të shqetësuar për një pandemi nga ky virus, por rritja e rasteve dhe ndikimi i tij janë të rëndësishme. Një mësim i mirë mund të merret nga pandemia për të ulur përhapjen, sidomos pasi nuk kemi vaksina ose trajtime për HMPV”, ka thënë doktori Paul Griffin.
Çfarë mund të bëjmë për të mbrojtur veten?
Ekspertët rekomandojnë që të vazhdohen të praktikohen masat higjienike për të reduktuar përhapjen e HMPV-së, veçanërisht gjatë muajve të dimrit. Praktikat e mira të higjienës, si larja e duarve dhe mbulimi i kollës dhe teshtimës, janë shumë të rëndësishme.
Griffin sugjeron që njerëzit të qëndrojnë në shtëpi kur janë të sëmurë, veçanërisht për të shmangur përhapjen e virusit te ata që janë më të rrezikuar.
“Nuk po sugjeroj që të kthehemi te kufizimet e ashpra të Covid-it, por mbajtja e një maske dhe kujdesi për të mos infektuar të tjerët është e rëndësishme”, ka thënë ai.
Ani pse HMPV po shkakton shqetësime në disa zona, nuk është i ngjashëm me Covid-19. Masat e thjeshta, si kujdesi personal dhe qëndrimi në shtëpi kur dikush është i sëmurë, mund të ndihmojnë në parandalimin e përhapjes së tij.
