SHSKUK-ja kërkon që pacientët të paraqesin ankesa në rast të mosmarrjes së shërbimeve

Menaxhmenti i SHSKUK-së ka kërkuar llogari nga dy klinika, ajo e Urologjisë dhe e Anestezionit për shkak të dy raportimeve të KOHËS që shpërfaqin raste të operimit pa anesteziolog e dështime të operimeve të planifikuara në momentin e fundit, të cilat më pas realizohen në spitale private. Ky institucion u ka bërë thirrje pacientëve që të ankohen në SHSKUK duke aluduar që kjo gjë të mos bëhet përmes mediave.

Llogari nga dy klinika të SHSKUK-së ka kërkuar menaxhmenti i këtij institucioni për shkak të dy raportimeve të KOHËS. Raportimet që një pacient është operuar pa anesteziolog në një klinikë, e raportimi që një operim ka dështuar në SHSKUK që më pas pacienti të operohej nga mjekët e njëjtë në një spital privat, ka bërë menaxhmentin të kërkojë raporte me shkrime nga të dy klinikat.
“Shërbimi Spitalor dhe Klinik Universitar i Kosovës është duke trajtuar rastet e raportuara së fundmi, lidhur me kryerjen e operacionit në Klinikën e Urologjisë, pa anestezion, e po ashtu, mosoperimin e pacientit tjetër dhe dyshimin se i njëjti është kryer në klinikë private. Menaxhmenti i SHSKUK-së, ka kërkuar raport me shkrim nga dy klinikat përkatëse dhe jemi në pritje të këtyre raporteve për të proceduar tutje me rastet”, thuhet në njoftimin e këtij institucioni. 
E këto raportime të KOHËS kanë shtyrë menaxhmentin të kërkojë publikisht nga pacientët që ankesat të drejtohen në SHSKUK duke aluduar që të mos përfshihen mediat. 
“SHSKUK-ja fton të gjithë qytetarët që ka ankesa, apo vështirësi gjatë trajtimit shëndetësorë, në institucionet e ShSKUK-së, t'i drejtohen me shkrim Komisionit të Ankesave të pacientëve në SHSKUK, i cili do të shqyrtojë çdo ankesë dhe shqetësim të qytetarëve”.
Të premten e javës së kaluar KOHA ka raportuar se te një pacient është ndërhyrë pa anesteziolog në Klinikën e Urologjisë, ndërkaq në arsyetimin nga Klinika, është thënë se pati urgjencë dhe se anesteziologu duhej të ishte në një sallë tjetër operimi.

Ndërkaq të dielën po ashtu në një artikull të KOHËS është raportuar se një pacient që ishte planifikuar të operohej në QKUK, më 17 nëntor, në fund të ditës është hequr nga orari i rregullt i operimeve, me arsyetimin se është pranuar një rast urgjent dhe se mjekëve u ka përfunduar orari i punës.

Por, po të njëjtën ditë, pacienti i është nënshtruar operimit në një spital privat dhe nga ekipi i QKUK-së që do të duhej ta operonte në sistemin publik.