O’Brien: Nuk do të lejojmë të përsëritet 24 shtatori, palët t’i kthehen dialogut

Ndihmëssekretari amerikan për çështje të Evropës dhe Euroazisë, James O’Brien, gjatë një brifingu me gazetarë ka thënë se SHBA-ja e ka bërë të qartë se nuk do të lejojë përsëritjen e një sulmi të ngjashëm sikurse ai në Banjskë të Zveçanit, më 24 shtator. Ai u ka bërë thirrje Kosovës e Serbisë që t’i kthehen dialogut të ndërmjetësuar nga Brukseli dhe t’i zbatojnë marrëveshjet për të cilat janë dakorduar

Shmangie nga aktet e dhunës dhe zbatim të shpejtë të marrëveshjeve të Brukselit ka kërkuar prej Kosovës dhe Serbisë ndihmëssekretari amerikan për çështje të Evropës dhe Euro-Azisë, James O’Brien.

Gjatë një brifingu me gazetarë të enjten, diplomati amerikan ka theksuar se fokusi i Shteteve të Bashkuara në Ballkan është rreth Kosovës, Serbisë dhe Bosnjë-Hercegovinës. Tek ka përmendur rëndësinë e bashkëpunimit midis Policisë së Kosovës, EULEX-it dhe KFOR-it, ai u ka përçuar palëve edhe një porosi.

“Kosova e Serbia duhet t’i shmangin aktet provokuese në veri. Jemi të kënaqur me bashkëpunimin mes Policisë së Kosovës, EULEX-it, KFOR-it. Deri tash ka qenë i mirë. Po ashtu edhe komunikimi me Beogradin në funksion të sigurisë. Presim të vazhdojmë të ketë diskutime transparente e të hapura gjatë muajve të ardhshëm. Sa i përket sulmit të 24 shtatorit të grupit që kishte hyrë në veri me shumë armatim, të dyja palët e kanë të qartë se nuk do të lejohet të ndodhë më”, ka thënë O’Brien, i cili ka qenë pjesë e delegacionit amerikan gjatë negociatave në Rambouillet ndërmjet Kosovës dhe Serbisë, më 1999.

Ai ka përsëritur se Bashkimi Evropian e ka mbështetjen e SHBA-së për t’i çuar palët drejt normalizimit të plotë të marrëdhënieve.

“Fuqimisht e mbështesim dialogun e ndërmjetësuar nga emisari i BE-së, Miroslav Lajçak. I ftojmë të dyja palët që t’i rikthehen me përgjegjësi dialogut. Përshëndesim arritjet që janë tërësisht teknike, sikurse çështja e targave. Por këta hapa tregojnë se mund të ecet përpara. Shumë domethënëse që në fund të vitit të kaluar, Këshilli Evropian foli për perspektivë të qartë për gjashtë vendet e Ballkanit Perëndimor. Kjo ofron shumë mundësi për këto vende, kur dihet se njerëzit e tyre po ikin drejt vendeve të Evropës. Duhet krijuar mundësi, prandaj jam i inkurajuar me angazhimet e BE-së për rritjen ekonomike”, ka deklaruar O’Brien.

Sa i përket Serbisë, O’Brien i ka përmendur dyshimet rreth keqpërdorimit të zgjedhjeve të 17 dhjetorit, duke shtuar se SHBA-ja i mbështet protestat paqësore të opozitës serbe.

“Qeveria e re e Serbisë të përfshijë opozitën, në këtë kuptim mirëpresim protestat paqësore të njerëzve që mendojnë se zgjedhjet nuk ishin të drejta dhe fer. Shqetësimet e ngritura nga ODIHR do t’i diskutojmë me Serbinë”, ka shtuar O’Brien, teksa i ka kritikuar subjektet opozitare në Serbi që “nuk ofrojnë asgjë tjetër përveç nacionalizmit”.

Duke folur për zhvillimet e fundit në Bosnjë-Hercegovinë, diplomati amerikan ka thënë se Washingtoni zyrtar e mbështet integritetin e këtij shteti, teksa ka bërë thirrje për shmangie të retorikës nxitëse.

Vitin 2024 ai e ka kualifikuar si sfidues, pasi që në pjesë të ndryshme të botës do të ketë zgjedhje të reja, përfshirë SHBA-në dhe BE-në. Sipas tij, me rëndësi është që qeveritë të dëshmojnë përgjegjësi në raport me qytetarët e tyre dhe të ruhet stabiliteti i tregjeve botërore.

“Një temë që është gjithmonë ka të bëjë me angazhimin për ruajtjen e tregjeve në botë. Pas sulmit të Rusisë është reduktuar eksporti i Ukrainës dhe kjo ka ndikuar në tregjet globale. Vitin e kaluar, Rusia u përpoq sërish që t’i bllokojë eksportet ukrainase, prandaj tani po punojmë me BE-në, Turqinë e vendet e tjera për t’u siguruar se Ukraina do të eksportojë”, ka theksuar O’Brien.

Sipas tij, Shtetet e Bashkuara deri më tash i kanë ofruar ndihmë financiare Ukrainës në vlerë prej 74 miliardë dollarësh.