-
Nga:
Ardit Kika
- 26 shkurt 2024 20:16
- Shpërndaje në:
Kryeparlamentari Glauk Konjufca është liruar nga akuzat për përdorim të armës apo mjetit të rrezikshëm në Gjykatën Themelore në Prishtinë. Kjo akuzë ka të bëjë me hedhjen e gazit lotsjellës në një mbledhjen të kryesisë së Kuvendit, ku ishte i paraparë procedimi ligjor i Marrëveshjes për Demarkacionin me Malin e Zi.
Gjykata Themelore në Prishtinë e ka liruar kryetarin e Kuvendit, Glauk Konjufca, nga akuza për përdorim të armës ose mjetit të rrezikshëm lidhur me hedhjen e gazit lotsjellës në mbledhjen e Kryesisë së Kuvendit më 18 gusht 2016.
Shpallja e aktgjykimit u bë në mungesë të Konjufcës.
Gjyqtarja Edita Çanta tha se përgjatë procesit gjyqësor nuk është vërtetuar që Konjufca, sa ishte deputet opozitar, e ka kryer veprën penale për të cilën e akuzon Prokuroria Themelore në Prishtinë.
Avokatja e Konjufcës në bazë të detyrës zyrtare, Abnore Zeqiri, e ka quajtur të drejtë dhe të pritur vendimin lidhur me lirimin e kryeparlamentarit.
Aktakuza për këtë rast ishte ngritur më 2017 dhe përmbante edhe akuzën për veprën penale pengim i personit zyrtar në kryerjen e detyrave zyrtare, mirëpo ndjekja për këtë vepër penale është parashkruar vitin e kaluar.
Në mbledhjen e vitit 2016, ku u hodh gaz lotsjellës në rend dite ishte futja në agjendë legjislative e Marrëveshjes për Demarkacionit të Kufirit me Malin e Zi.
Atëkohë, Lëvizja Vetëvendosje e ka kundërshtuar ashpër Marrëveshjen për Asociacionin e Komunave me Shumicë Serbe dhe atë për Demarkacionin e Kufirit me Malin e Zi.
Përdorimin e gazit lotsjellës si formë kundërshtimi në Kuvend e pati konfirmuar edhe kryeministri Albin Kurti në një shqyrtim gjyqësor para më shumë se gjashtë vjetësh.
Deri më tani, për hedhjen e gazit lotsjellës në Kuvend, është dënuar vetëm ish- deputeti i Kuvendit të Kosovës, Driton Çaushi.
Më 12 tetor 2021, Çaushi ishte dënuar nga Gjykata Themelore me 14 muaj burgim me kusht, e më 13 prill të vitit 2022, atij i ishte vërtetuar dënimi nga Gjykata e Apelit.
Ndërsa me nga 200 euro gjobë, për të njëjtën vepër penale janë dënuar ish-deputetet e Kuvendit, Donika Kadaj Bujupi dhe Aida Dërguti.
