-
Nga:
Sefer Zogaj
- 6 mars 2022 20:15
- Shpërndaje në:
Krerët institucionalë të shtetit, ata të opozitës, si dhe mijëra qytetarë, të dielën kanë bërë homazhe te memoriali “Adem Jashari” në Prekaz si përkujtim për sakrificën e familjes Jashari me rastin e 24-vjetorit të sulmeve të policisë serbe kundër Jasharëve, ku u vranë 58 veta, shumica gra e fëmijë
Prishtinë, 6 mars – Krerë të institucioneve e të partive, si dhe shumë qytetarë, të dielën kanë nderuar sakrificën e familjes Jashari, që shënoi kthesën e madhe historike me epilog çlirimin e vendit.
Përkulje për veprën e kurora të shumta lulesh u vunë në memorialin “Adem Jashari” në Skënderaj.
Përfaqësuesi i familjes Jashari, Bekimi, kujtoi se moti i 6 marsit 1998, kur u vranë disa nga anëtarët e familjes Jashari, ishte ngjashëm me atë që mbizotëroi të dielën, në 24-vjetorin e Epopesë së Ushtrisë Çlirimtare të Kosovës (UÇK).
“24 vjet më parë ishte mot i njëjtë si sot, siç tregojnë Besarta dhe Bashkimi, që tani është komandant i FSK-së”, ka thënë Jashari.
Ai ka folur për betejën tërësisht të pabarabartë, pasi, sipas tij, rreth 15 mijë paramilitarë, policë e ushtarë serbë kishin sulmuar shtëpitë e familjes Jashari dhe për tri ditë luftë (5, 6 e 7 mars 1998) ishin vranë 58 anëtarë të familjes Jashari dhe disa të afërm të kësaj familjeje.
Me gjithë epërsinë numerike në personel e në armatim, forcat serbe hasën në rezistencë të Jasharëve, që po mbronin pragun e shtëpisë.
Mes të vrarëve, shumica ishin fëmijë e gra.
“Ata u sulmuan në shtëpinë e tyre, shumica dërrmuese e familjarëve ishin gra e fëmijë, që tregon se kjo ishte ndër masakrat më të tmerrshme të kryera nga regjimi gjenocidial i Serbisë, për të cilën ende s’ka drejtësi”, ka thënë presidentja e Kosovës, Vjosa Osmani, gjatë homazheve të dielën.
Në këto homazhe kanë marrë pjesë edhe kryeministri i Kosovës, Albin Kurti, dhe kryekuvendari Glauk Konjufca.
“Ushtria Çlirimtare e Kosovës ka bërë luftë mbrojtëse dhe drejtësia, si dhe e vërteta jonë nuk mund të tjetërsohen as nga deformimet që vijnë e as nga mohimet që bëhen”, ka deklaruar kreu i ekzekutivit, Kurti.
Ndërsa Konjufca sakrificën e Jasharëve e ka vendosur në qendër të të gjitha përpjekjeve për liri e pavarësi.
“Mendoj që sakrifica e Jasharëve është momenti më i rëndësishëm brenda përpjekjeve çlirimtare të popullit të Kosovës”, ka thënë Konjufca.
Pos krerëve të shtetit, homazhe kanë bërë edhe liderët e partive opozitare.
Memli Krasniqi, kryetar i Partisë Demokratike të Kosovës (PDK), Epopenë e UÇK-së e ka vlerësuar si kthesën kryesore të historisë së re të Kosovës.
“Këto data janë ato që kanë shënuar kthesën më të madhe në histori të Kosovës, jo vetëm duke e zgjuar vëmendjen e gjithë botës, por duke e zgjuar edhe vëmendjen e gjithë kombit tonë”, ka thënë ai.
Drejtuesi i Lidhjes Demokratike të Kosovës (LDK), Lumir Abdixhiku, ka thënë se familja Jashari e ka mbrojtur pragun e shtëpisë.
“Ata mbrojtën pragun e shtëpisë së tyre dhe kështu mbrojtën edhe përpjekjen tonë kolektive për liri e për çlirim”, pohoi Abdixhiku.
Më i shkurtër në deklaratë ishte Ramush Haradinaj, lider i Aleancës për Ardhmërinë e Kosovës (AAK).
“Jemi për nderim në Prekaz, vendin ku ka ra komandanti legjendar dhe familja e tij, vendi ku ka ndodhur kthesa për shqiptarët”, është shprehur Haradinaj.
Homazhe kanë bërë edhe kryetarë të partive joparlamentare dhe personalitete të tjera të jetës publike.
Më 5 mars policia serbe e rrethoi shtëpinë e Jasharëve në Skënderaj dhe për tri ditë e sulmoi atë pa zgjedhur mjete, derisa u shua e gjitha rezistenca.
Çdo vit mijëra njerëz nga të gjitha trojet shqiptare e vizitojnë Prekazin për ta ruajtur memorien historike që përmban rezistencën e Jasharëve.
