Në një komunikatë për media të AKP-së është thënë se qiramarrësit e pikave të karburantit në Mitrovicë të Veriut dhe Zubin-Potok kanë punuar pa licencë dhe dy prej pikave as nuk kanë qenë të fiskalizuara. Në një reagim për këtë, ministri i Punëve të Brendshme, Xhelal Sveçla, ka thënë se “shkelësit e ligjeve dhe rregullave si ‘Nis Petrol’, damar i “Gazpromit” rus, nuk kanë vend në Republikën e Kosovës”
Inspektorati i Ministrisë së Industrisë, Ndërmarrësisë dhe Tregtisë në Kosovë ua ka ndërprerë të martën veprimtarinë tri pikave të karburantit në veri të Kosovës, ndërsa Agjencia Kosovare e Privatizimit (AKP) ua ka ndërprerë kontratat e qirasë.
Në një komunikatë për media të AKP-së është thënë se qiramarrësit e pikave të karburantit në Mitrovicë të Veriut dhe Zubin-Potok kanë punuar pa licencë dhe dy prej pikave as nuk kanë qenë të fiskalizuara.
“Kjo përbën shkelje të kontratave të qirasë me AKP-në dhe Ligjit nr. 08/L-018 për Tregtinë me Produkte të Naftës dhe Karburante të Ripërtërishme, duke cenuar kështu sigurinë e konsumatorëve dhe të mjedisit”, thuhet në njoftimin e AKP-së.
Policia e Kosovës ka asistuar në aksionin e Inspektoratit të Ministrisë së Industrisë dhe të Agjencisë Kosovare të Privatizimit.
Këto pika karburanti e kanë logon e kompanisë Industria e Naftës e Serbisë (NIS).
Mirëpo, sipas informatave të REL-it, ato prej disa vjetësh janë në pronësi të biznesmenëve nga veriu i Kosovës.
Pronarja kryesore e kompanisë NIS është “Gazprom Neft”, më pas një përqindje ka kompania e saj ombrellë, “Gazprom” dhe shteti i Serbisë.
“Gazprom Neft” është prodhuesi i tretë më i madh i naftës në Rusi.
Marko Gjuriq, sa ka qenë në pozitën e drejtorit të Zyrës për Kosovën në Qeverinë e Serbisë, pati marrë pjesë në hapjen e njërës prej pikave të pompave të NIS-it në veri.
Duke komentuar mbylljen e këtyre pikave, ministri i Brendshëm i Kosovës, Xhelal Sveçla, ka thënë se “epoka e përfitimeve dhe pasurimeve në kurriz të shtetit dhe qytetarëve po perëndon” dhe që krimi në pjesën veriore ka qenë i thellë dhe i organizuar me vite.
“Për shtetin dhe qytetarët pa dallim do të bëjmë gjithçka, për keqpërdoruesit ballafaqim me ligjin. Shkelësit e ligjeve dhe rregullave tona si ‘Nis Petrol’, damar i ‘Gazpromit’ rus, nuk ka vend në Republikën e Kosovës”, ka thënë ai përmes një postimi në Facebook.
Është e paqartë nëse këto pompa janë furnizuar me karburante nga NIS-i i Serbisë, apo nga burime të tjera.
Hapja e pompës NIS në vitin 2016 ishte kundërshtuar ashpër nga autoritetet e Kosovës dhe notë proteste i ishte dërguar edhe Bashkimit Evropian dhe të gjitha institucioneve ndërkombëtare.
Autoritetet e Kosovës e patën cilësuar punën e kësaj kompanie të naftës në Mitrovicë të Veriut si përpjekje për të përhapur ndikimin e Rusisë në Kosovë dhe rajon.
