Portreti i Trumpit dhe akuzat ndaj autores dëmtojnë artisten

Artistja britanike, e cila u quajt “më e keqja” nga presidenti amerikan, Donald Trump, pasi ai u tall me një portret që ajo krijoi për të, ka thënë se kritikat e vunë “integritetin e saj në pikëpyetje” dhe se po e kërcënojnë karrierën e saj.

Sarah A Boardman ka pikturuar portretin zyrtar të Trumpit për ndërtesën e shtetërore të Kolorados në Denver, ku piktura qëndroi e varur për gjashtë vjet, nga viti 2019.

Trumpi në një postim në platformën “Truth Social” muajin e kaluar, shkroi se portreti ishte “shtrembëruar qëllimisht”. Trumpi ka thënë se portreti i ish-presidentit amerikan, Barack Obama, i punuar nga Boardman ishte “i mrekullueshëm”, por “ai për mua është me të vërtetë më i keqi”.
Në komentin e saj të parë që nga incidenti, Boardman ka thënë se komentet e Trumpit nënkuptonin se “qëllimet, integriteti dhe aftësitë e saj, për mendimin tim, ishin vënë në dyshim”.

Boardman u është përgjigjur pretendimeve të presidentit në një deklaratë, duke thënë se ajo kishte “përfunduar portretin me saktësi, pa ‘shtrembërim të qëllimshëm’, paragjykime politike ose ndonjë përpjekje për të karikaturuar subjektin aktual ose të nënkuptuar”.

Artistja ka thënë se derisa ajo pranoi të drejtën e Trumpit për të komentuar, “akuzat shtesë se unë ‘shtrembërova qëllimisht’ portretin dhe se ‘duhet të kem humbur talentin tim kur u rrita’, tani po ndikojnë drejtpërdrejt dhe negativisht në biznesin tim prej mbi 41 vjetësh, i cili tani rrezikon të mos rikuperohet”. 

Duke diskutuar punën e saj me “Colorado Times Recorder” të vitit 2019, ajo pranoi se “gjithmonë do të kishte zemërim ndaj një presidenti nga njëra palë ose tjetra. Është natyra njerëzore”. 

Në përgjigje të kritikave të Trumpit, zyrtarët thanë se portreti do të hiqej. Boardman ka thënë se për gjashtë vjetët e parë pasi pikturoi portretin, ajo “mori vlerësime dhe reagime jashtëzakonisht pozitive”, porse që nga komentet e Trumpit “kjo ka ndryshuar për të keq”.

Boardman u lind në Britani. Në faqen e saj të internetit thuhet se ajo ka kaluar vite duke udhëtuar nëpër Australi, Guinenë e Re, Zelandën e Re, Malajzi, Lindjen e Mesme, Evropë dhe SHBA derisa “kryen karrierë të suksesshme në linjat e udhëtimit ajror dhe biznes”. 

Në vitin 1985 ajo filloi të studionte teknikat e mjeshtërve të vjetër në Gjermani dhe të ndërtonte një karrierë të suksesshme si artiste, duke fituar përfundimisht një “thirrje mbarëkombëtare për artistë” nga kryeqyteti i shtetit të Kolorados, Denver, për të pikturuar portretet zyrtare të presidentëve Barack Obama dhe Donald Trump.

Trumpi ruan afër imazhin e tij. Në janar të vitit 2025, para inaugurimit të tij, ai publikoi një portret që u përshkrua nga kritikët si serioz ose fatkeq dhe dukej se i referohej fotografisë së tij të vitit 2023.
Fotografinë  e mori pasi u akuzua për përpjekje për të përmbysur humbjen e tij në zgjedhjet e vitit 2020 ndaj Joe Biden në shtetin e Georgias – një akuzë që Trumpi e mohoi.

Pas kritikave të tij ndaj Boardman, i dërguari i tij Steve Witkoff ka konfirmuar se Shtëpisë së Bardhë i ishte dërguar një vepër e re nga Moska, e cila ishte dhuratë nga Vladimir Putin. Zëdhënësi i Kremlinit, Dmitry Peskov, e ka përshkruar atë si “dhuratë personale”.

Witkoff e përshkroi pikturën si një “portret të bukur” nga një “artist kryesor rus”.