“Motra Tone”, vepra ikonike e artistit poliedrik Kolë Idromenos, po shndërrohet në mural në qytetin e Shkodrës. Kryebashkiaku Benet Beci ndau në rrjetet sociale pamje nga realizimi i murales.
“Një nga punimet më të veçanta të Kolë Idromenos po pasqyrohet në një mural nga artistët tanë në hyrje të Shkodrës”, ka thënë kryebashkiaku i Shkodrës.
“Motra Tone” ( 75 me 60 centimetra) u realizua nga piktori Kolë Idromeno në vitin 1883. Këtë portret piktori Idromeno e realizoi në moshën 23-vjeçare dhe është vepra e parë realiste në artet pamore shqiptare. Sipas kritikës, mënyra e qëndrimit, realizimi me mjeshtri i çdo detaji, drita e qetë që e përshkon të tërë figurën në përgjithësi dhe portretin në veçanti flasin për mjeshtërinë e lartë të Idromenos.
Portreti “Motra Tone” nuk u ekspozua për sa kohë ishte gjallë piktori. “Dihet mirëfilli që ky portret nuk është pikturuar në bazë të fantazisë, por në bazë të modelit të gjallë përpara. Për realizimin e veprës ka pozuar vetë motra e piktorit, Tone Shkanjeti (Idromeno), një vit më e madhe se i vëllai. Portreti që u bë i famshëm fillimisht quhej ‘Portret i gruas shkodrane’ e më vonë, ku vepra mbërriti në Galerinë Kombëtare, pas vitit 1954, u emërua si ‘Motra Tone’”, shkruhet në përshkrimin e veprës.
Nga fundi i shekullit 19 dhe fillimi i shekullit 20, pikturat e Idromenos u shfaqën në ekspozita të ndryshme ndërkombëtare si në Budapest, Romë, Bari, New York e në vende të tjera. Piktura e fundit e Idromenos është “Plaku i Postrribës” (1939), ku ai shpreh gjendjen e vështirë ekonomike të fshatit shqiptar. Fusha të tjera ku Idromemo spikat janë skulptura dhe arkitektura – me rreth 60 ndërtime private e publike në Shkodër të projektuara prej tij.
Në 12 dhjetor të vitit 1939 u nda nga jeta Nikolla “Kol” Idromeno. Ai u lind më 15 gusht 1860 në Shkodër. Ishte artist; piktor, arkitekt, urbanist, fotograf, skenograf, muzikant, kompozitor këngësh popullore, operatori i parë i filmave dokumentarë në Shqipëri, që më 1912. Thuhet se familja e tij ishte nga më të njohurat e Pargës në Çamëri. I ati, Arsen Idromeno, kishte ardhur në Shkodër nga ishulli Hidro i banuar nga arbëreshët e Greqisë. Kola filloi të pikturonte qëkur ishte fëmijë. Mësime për vizatim mori duke qëndruar pranë fotografit të njohur të qytetit, Pietro Marubi, i cili e ndihmoi Kolën për të ndjekur studime për pikturë në Venecia. Por, i pamësuar me disiplinën në shkollë, pas 6 muajsh, Kola braktis mësimet pasi fillon të punojë pranë piktorëve dhe artistëve vendas. Kur kthehet në Shkodër, më 1871, ai realizon pikturat e para, një prej të cilave “12 luftëtarët e Pargës në lundër” në përkujtim të largimit të paraardhësve nga Parga drejt Himarës.
