-
Nga:
Ridvan Hamza
- 14 shkurt 2019 20:21
- Shpërndaje në:
Një dramë teatrale e vendosur në një qytet imagjinar homofob, më shumë se një vit pas premierës, vazhdon të nxisë komente urrejtjeje e kërcënuese për komunitetin LGBTI, tani edhe në nivel zyrtarësh të shtetit, raporton KTV.
Xheladin Krasniqi, i punësuar në Zyrën e Arkivit të Ministrisë së Drejtësisë, shfaqjen “55 shades of Gay” e ka konsideruar si degjenerim të skajshëm dhe ka sugjeruar, ndër të tjerash, edhe ‘heqje koke’ në komentin e tij në faqen e Qendrës Multimedia.
“Komentet bëhen edhe më shqetësuese, kur bëhen nga një zyrtar i shtetit dhe janë të drejtuara drejt artistëve,” ka thënë autori i shfaqjes, njëherësh drejtor i Qendrës Multimedia, Jeton Neziraj, derisa ka bërë thirrje policisë e prokurorisë që të hetojnë rastin.
Ministri i Drejtësisë, Abelard Tahiri, ka lëshuar një deklaratë me të cilën është distancuar nga komentet e zyrtarit në fjalë, por nuk ka përmendur të jetë hapur ndonjë procedurë disiplinore ndaj tij.
As Policia në Kosovë, nuk është përgjigjur në thirrjet e mesazhet e televizionit, për të treguar nëse është ndërmarrë ndonjë veprim lidhur me këtë rast.
Përderisa nuk është hera e parë që kërcënime të tilla janë bërë në drejtim të komunitetit artistik.
Shfaqja “55 Shades of Gay”, është duke vazhduar rrugëtimin e saj. Përveç në vend, shumë shpejt do të shfaqet edhe në SHBA.
