Vritet një grua në Gjakovë

Sot pak pas mesnatës, ka ndodhur një vrasje tjetër e një gruaje në Gjakovë.

Siç ka thënë për Koha.net zëdhënësi i Policisë Rajonale në Gjakovë, Kristë Gjokaj, rreth orës 0:30, policia është njoftuar për të shtëna në lagjen “Kolonia”.

Policia ka dalë në vendin e ngjarjes dhe ka konstatuar se është plagosur një grua 50 vjeçare, e cila më pas ka ndërruar jetë në Spitalin Rajonal të Gjakovës.

“Dyshimet e para janë se incidenti është shkaktuar nga burri i saj. Deri më tani kemi vetëm dyshime për vrasje aksidentale”, ka thënë Gjoka.

Sipas burimeve të Kallxo.com, çifti nga komuniteti egjiptas ishin duke qëndruar në oborr ku kanë qenë duke e pastruar një revole që e kishin së bashku. Fëmijët e tyre thuhet se kanë dëgjuar vetëm një të shtënë ndërsa kur e kanë dalë e kanë parë të atin duke e ndihmuar nënën e plagosur.

Mësohet se pas kësaj ngjarje, burri është në arrati.

Kjo ngjarje ka ndodhur në rrugën “Ali Ibra” në Gjakovë.

Disa javë më parë, në një fshat të Gjakovës, një burrë vrau gruan e tij 40-vjeçe dhe vajzën e tij 9-vjeçare, pas dështimit të intervenimit të Policisë së Kosovës, në thirrjet e viktimës.

Hetimet po vazhdojnë.