-
Nga:
Marigona Redenica
- 7 shtator 2022 19:52
- Shpërndaje në:
I akuzuari për dhunimin e 11-vjeçares në Prishtinë, Ekrem Rexhepi, është transferuar të mërkurën në Qendrën e Sigurisë së Lartë.
Nga Shërbimi korrektues thonë se kjo masë u mor për mbrojtje të tij, ndërkohë avokati i tij pretendon se ai është sulmuar në qendrën e paraburgimit.
Avokati Fitim Limani, ka thënë të mërkurën për KOHËN se informacionet që klienti i tij është sulmuar brenda SHKK-së, i ka marrë nga Gjykata Themelore në Prishtinë.
Pretendimet e Limanit i ka mohuar Shërbimi Korrektues i Kosovës, por ka pranuar se Rexhepi është transferuar.
Zëdhënësi i SHKK-së, Florent Gashi, ka thënë për KOHËN se Rexhepi është transferuar në mënyrë që të parandalohet ndonjë sulm i mundshëm ndaj tij.
“Nuk është sulmuar. Ai është dërguar në Burgun e Sigurisë se Lartë për çështje të sigurisë së tij, për të parandaluar ndonjë sulm të mundshëm për shkak të veprës për të cilën dyshohet”, ka thënë Gashi.
Për deklarimin e SHKK-së, avokati Limani ka thënë se nuk e di pse ata e mohojnë që sulmi ka ndodhur. Ai shtoi se personalisht nuk flet për çështje që nuk ka informacione të sakta.
“Në bazë te informatave që i kemi nga Gjykata Themelore në Prishtinë, Ekrem Rexhepi është sulmuar nga të burgosurit e tjerë dhe është dërguar në Burgun e Sigurisë së Lartë. Kjo është informatë nga gjykata, është e pamoralshme nga ana ime nëse unë si avokat të flasë diçka nëse nuk e kam informatën e saktë. Unë nuk e di pse thonë ata ashtu”, ka thënë Gashi.
E kontaktuar nga KOHA, Gjykata Themelore nuk ka dhënë ndonjë informacion në lidhje me këtë.
Ekrem Rexhepi është një nga pesë të dyshuarit për dhunimin e 11-vjeçares më 27 gusht në Prishtinë. Atij i është caktuar masa e paraburgimit prej 30 ditësh.
