-
Nga:
Ermir Bujupaj
- 14 mars 2023 09:55
- Shpërndaje në:
Shkolla e parë shqipe në Ferizaj, që ishte shndërruar në gjimnaz, është djegur në mëngjesin e së martës. Ky objekt është në mbrojtje të shtetit si trashëgimi kulturore, kanë bërë të ditur nga Komuna.
Zëdhënësi i Komunës së Ferizajt, Selim Marevci, ka thënë për KOHËN se objekti i quajtur "Gjimnazi i Vjetër" ka nisur të restaurohej të hënën.
“Objekti është shkolla e parë e qytetit të Ferizajt. Qeveria e ka futur në projektbuxhet dhe është thënë se do të restaurohej. Restaurimi ka nisur të hënën, por më pas është djegur”, ka deklaruar ai.
Nga Policia e Kosovës i thanë KOHËS se zjarri i shkaktuar në rrugën “Ramadan Rexhepi”, është lokalizuar dhe pos dëmeve materiale nuk ka persona të lënduar.
“Rreth orës 04:25 kemi pranuar një informatë se në një objekt shkolle të vjetër, jofunksionale në rrugën ‘Ramadan Rexhepi’ është një incident zjarri. Ekipe të Policisë , zjarrfikësve kanë dal menjëherë në vendin e ngjarjes. Zjarri është lokalizuar, veç dëmeve materiale nuk raportohet për të lënduar”, thuhet në njoftimin policor.
{gallery}
Fotot: Driton Paçarada / KOHA, 2017
