Një person ka vdekur të dielën në një aksident trafiku në rrugën nacionale Mitrovicë-Leposaviq, pas një aksidenti mes një veture, një kamionete dhe një motoçiklete, rreth orës 16:40.
Zëdhënësi i Policisë për rajonin e Mitrovicës së Jugut, Avni Zahiti, i ka thënë KOHËS se jetën e ka humbur vozitësi i motoçikletës, e lëndime ka pësuar një person tjetër.
I lënduari po trajtohet në Spitalin Rajonal në Mitrovicë.
“Rreth orës 16:40 është raportuar për një aksident trafiku me pasojë fataliteti i shkaktuar në dalje të Mitrovicës në rrugën nacionale Mitrovicë – Leposaviq. Në aksident janë përfshirë tri automjete një veturë , një kamionetë dhe një motoçikletë, ku si pasojë e lëndimeve të pësuara në aksident ka humbur jetën motoçiklisti. Ndërsa lëndime ka pësuar edhe një person tjetër i cili po trajtohet ne Spitalin Rajonal në Mitrovicë”, thuhet në njoftimin e Zahitit.
Njësitet policore kanë dalë në vendin e ngjarjes dhe po i zhvillojnë hetimet.
