-
Nga:
Donisa Fazliu
- 11 korrik 2024 10:31
- Shpërndaje në:
Është deklaruar para trupit gjykues për herë të parë i akuzuari Dardan Krivaça për dhunimin dhe vrasjen e Marigona Osmanit.
Krivaça ka deklaruar se ai dhe e ndjera kanë qenë të dy përdorues të lëndëve narkotike.
Krivaça ka mohuar t’i ketë shkaktuar lëndime të rënda Osmanit e sipas tij atë e ka goditur me “3-4 shuplaka” por jo me shkop.
Ai ka thënë se plagët që Osmani ka pësuar i ka marrë si pasojë e rrëzimit nga shkallët.
“Nuk e kam goditur asnjëherë me shkop. Përleshja ka ndodhur në fillim në mëngjesin e së shtunës, pastaj të nesërmen iu ka përkeqësu gjendja të ndjerës, kur e kom pa që është gjendje të keqe, s’kom mujt me vërejt se edhe vet jam kanë në gjendje të narkotikëve, e kam marrë e kam dërgu në spital, kam qenë i stresum, në panik, në paranojë, i traumatizum, s’kam qenë vetvetja. Asnjëherë nuk e kam goditë të ndjerën me shkop. Me duar e kam goditë 3-4 shuplaka, kjo ka ndodh të shtunën. Të dielën asnjëherë nuk e kam goditë. Nuk i kam thyer asnjë pjesë të trupit, nuk e kam goditë asnjëherë siç është lëndu. Lëndimet kanë ardhë si pasojë e rrëzimit nga kati i 5-të, që kemi qenë duke shku te spitali. Jam rrëzu bashkë me të ndjerën 2 herë. 1 herë më ka ra nga duart, s’kam mujt me çu për shkak të panikut, stresit, s’kam pas fuqi as vet. Ka pasë lift është vonuar lifti. Arbëri ka dalë e ka thirrë liftin por është vonuar, dhe kam vendosur me shku shkallëve”, është deklaruar Krivaça para trupit gjykues.
E, Krivaça ka mohuar se i akuzuari tjetër, Arbër Sejdiu, ka qenë pjesëmarrës në veprat për të cilat akuzohen. Sipas tij, të tre ishin në ndikim të kokainës.
“Unë e kam goditë të ndjerën por jo me lënduar siç janë lëndimet. Jemi kapë mes vete, jem goditë mes vete, Arbëri s’ka qenë prezent atë ditë hiç, nuk ka marrë pjesë në asnjë veprim hiç. Ai u ardh m’i marrë rrobat dhe pasaportën e tij. Ka qëndru gjatë gjithë natës me mu, duke pirë kokainë. Ditën e diele Arbëri, ka qenë në banesë. Arbëri ka dalë ka ble bukë, për mua, Marigonën dhe për vete. Ora e saktë nuk më kujtohet, kur e kam dërgu Marigonën, veç e di që masdite. Prej të premtes deri të dielën kam pi kokainë, e dini që kokaina nuk të lenë flejtë, kam qenë gati në gjendje overdozë. Edhe Arbëri edhe Marigona kanë qenë në efekt të drogës. Arbëri kur ka ardhë në mbrëmje, ka pirë drogë, kurse e ndjera ka pi para se me ardhë Arbëri, me ndjerën kemi pirë çdo ditë, çdo natë. Me datën 22 e ndjera nuk ka pirë drogë, me 21 ka pirë drogë. Deri të dielën me të ndjerën kemi pirë drogë”, ka thënë ai.
Sipas Krivaçës, Osmani ishte nën ndikim të narkotikëve edhe në ditën kritike.
"Të dielën para se me çu të ndjerën te mjeku, e ka humbë vetëdijen ka qenë në gjendje nuk e dijë si ta shpjegojë por ka qenë tepër e drogiratë. Kur ka fillu me vjellë e me ju ndalë fryma, atëherë e kam dërguar në spital. Marigona ka qenë në dhomën time dhe të saj. Arbëri ka qenë në dhomë tjetër, e kam thirrë Arbërin me thirrë një mjek me bo diçka, e kam kap në krah të ndjerën, Arbëri e ka thirrë liftin. Unë kam vazhduar shkallëve te poshtë me të ndjerën, Arbëri ka mbetë nalt e ka mshel banesën, e ka prit liftin, jemi takuar poshtë. Ka pasë qytetarë para barnatores Zeka, kanë dashtë me m’dhonë ndihmë, pastaj Arbëri ka shku tek emergjenca, ka kërkuar ndihmë, kom prit me ardhë me m’ndihmu dikush me çu deri te mjeku, nuk e kapi kurrkush, e kom kap vet zhag tu e dërgu, kam hyrë brenda në spital, mas një doktori a infermier nuk e di çka u kanë, më ka dërgu te dhoma, te krevati në spital, e kam shtri vetë. Kanë thanë që ka puls, nuk e di nuk kam qenë në gjendje me ditë çka ka. Doktori boni panik që infermierët mi sjell aparaturat".
Krivaça më tej ka insistuar vazhdimisht se lëndimet nuk ia ka shkaktuar me shkop Osmanit dhe se asnjëherë nuk e ka lënduar rëndë. Ai ka insistuar se Osmani ishte rrëzuar prej shkallëve.
“Ka ra prej shkallëve në tonat mënyrat, nuk e di qysh rrëzohet njeri prej shkallëve. Nuk e di saktë qysh është rrokullisur, por bashkë jemi rrëzuar. Unë kur jam rrëzuar jam lënduar, në këmbe, në dorë, në shpinë, në fytyrë, kam pas lëndime edhe unë. Arbërin në spital e kam parë njëherë kur ka shku me thirrë ndihmën, kur kam dal në korridor të spitalit e kam parë prapë në korridor të spitalit, s’kam qenë në gjendje emocionale, nuk di qysh me shpjegu, kam fillu me vjellë, me qajtë, nuk di me përshkru atë gjendje. Më kanë larguar prej dhomës se spitalit, ka qenë mbledhë ekipa. S’kom mujt me pa diçka tjetër se jam ulë në korridor të spitalit dhe kam fillu me qajtë. Pas arrestimit, ma kanë thirrë një mjek, ka ardhë më m’kontrollu, ai ka kërku me mi bo analizat për shkak gjendjes që kam qenë, nuk më kanë bërë asnjë analizë, një polic e ka thirr prokurorin në telefon dhe i ka thënë s’ka nevojë për analiza”, ka thënë ai.
Për shkopin që përmendet se Krivaça e goditi me të të ndjerën, ai ka thënë se ishte aty për sigurinë e Osmanit.
“Ai shkopi që përmendet është shumë më herët, është i vendosur ne radiator a nuk po e di se nana ka jetu ma herët aty, se gjatë çeljes derës nga dikush m'u mbrojt ajo me të. Asnjëherë nuk e kam goditë të ndjerën me shkop. As që bëhet fjalë, as qe ka ekzistu, m’i mshu dikush partneres, grusë tem, jo Arbëri po kurrkush hiç”.
Ai ka treguar për planet e së ardhmes që pretendon se pati me të ndjerën.
“Me Marigonën e kemi bo plan mu martu në shtator me bo kurorëzimin. Kah tetori, nëntori me shku në Evropë në Francë diku me jetu. Kemi pasë plan me bo edhe një fëmijë, që me pasë mundësi për dokumenta me përfitu, që në atë aspektin qe shumë shqiptarë i fitojnë letrat atje. Si familja e saj si familja e jem, kanë vet familjarë që me shku atje. Unë kom bo zgjidhje me ecë nëpër male, por që familja e saj edhe unë s’kemi qenë dakord që e ndjera me ardhë me ecë maleve”.
Kur është pyetur nga avokati Skender Musa se a i kishte dhënë ndonjë shkop Sejdiu atij, Krivaça është përgjigjur: “Arbëri s’ka qenë në rrjedha çka ndodhë, shumë pak ka ditë, s’ka ditë hiç”.
“Me dashtë me vra Marigonën kam mujtë në mënyra të ndryshme, po asnjëherë nuk kom dashtë me pa të vdekun e lë më të vrarë, asnjëherë s’kom dashtë me vra dikë tjetër, e le më Marigonën”.
Ndërkaq, Sejdiu e ka shfrytëzuar të drejtën të mbrohet në heshtje.
Gjykata Themelore e Ferizajt më 4 gusht 2023 e ka dënuar me burgim të përjetshëm Dardan Krivaçën për vrasjen e Marigona Osmanit. Por rasti është kthyer në rigjykim nga shkalla e dytë.
Në seancën e dytë të rigjykimit të Dardan Krivaqës dhe Arbër Sejdiut më 11 qershor, të dy të akuzuar për dhunim dhe vrasjen e Osmanit më 2021, eksperti mjekoligjor pati shpjeguar se vdekja e Osmanit erdhi si pasojë e lëndimeve të rënda dhe të shumëfishta trupore. Raportin e ekspertit e pati kundërshtuar pala mbrojtëse e Krivaçës, duke kërkuar që të përsëriten disa ekzaminime.
