Fshati i djegur i Mitrovicës që u rindërtua pas luftës

Rahova është fshati i Mitrovicës, i cili me natyrën e mrekullueshme i frymëzon çdo ditë banorët që i japin jetë vendlindjes së tyre.

Është fshat malor dhe ndodhet pak kilometra në periferi të qytetit mitrovicas.

Ky vendbanim ishte destinacioni i radhës që u vizitua nga ekipi i emisionit “JETA” në Kohavision.

Me të hyrë në Rahovë ekipi ka takuar vendës, të cilët merren me blegtori si veprimtari e rëndësishme për ta në fshat.

Sipas vendësve në Rahovë jetonin afër 400 banorë, ndërkaq aktualisht ky fshat numëron rreth 200 banorë rezident.

Ruzhdi Peci, njëri nga banorët e Rahovës, tregon se fshatin e lindjes nuk e ka lëshuar asnjëherë.

Ky fshat për të është tejet i veçantë, pasi ai bashkë me mbi 60 banorë kishin dhënë kontribut edhe për Minierën e Trepcqës.

Peci thekson se fshatin Rahovë ishte djegur plotësisht në periudhën e luftës. Si vendës ishin detyruar që ta braktisnin fshatin për t’u kthyer sërish në të pas përfundimit të luftës.

“Momenti më i vështirë për mua në të gjithë jetën time ishte ai kur të gjithë banorët përnjëherë ia kthyem shpinën fshatit në luftë. Por nuk e harroj edhe momentin më të lumtur, atë kur u kthyem të gjithë pasi Serbia kapitulloi”, thotë Ruzhdi Peci.

Banorët vendës thonë se tokat e fshatit të tyre ishin tejet të pëlleshme e prodhonin çka do që ata mbillnin në to.

Produktive i bënte ujitja e tyre me ujin që rridhte nga bjeshka e Majdanit, siç e quajnë rahovasit.