I djersitur në Bejrut

Naim Kasemi tani komandon grupin më të fuqishëm terrorist të Lindjes së Mesme – por luftëtarët e tij janë të dobësuar. Së fundmi ai vepronte më shumë në prapaskenë, por tani Kasemi është emëruar si kreu i ri i Hizbollahut. A do të mundë pasardhësi i Hasan Nasrallahut të vrarë të shkaktojë edhe më shumë fatkeqësi?

Një muaj pasi ushtria izraelite vrau kreun e Hizbollahut, Hasan Nasrallah, në një lagje të Bejrutit, veteran Naim Kasemi mori udhëheqjen e grupit gueril libanez. Kështu njoftoi Hizbollahu të martën.

Kasemi ka qenë për më shumë se tre dekada funksionar i lartë i grupit më të fuqishëm terrorist të Lindjes së Mesme. Ai ishte deri tani zëvendëssekretar i përgjithshëm i Hizbollahut. Në këtë rol, pas vrasjes spektakulare të Hasan Nasrallahut, Kasemi iu drejtua publikut. Në një video 19-minutëshe, ai u përpoq të inkurajonte luftëtarët e Hizbollahut të vazhdonin sulmet ndaj Izraelit.

Ai tha se Hizbollahz dëshiron “të mbështesë të gjithë vëllezërit në Gaza dhe të mbrojë Libanin.” Ndonëse ka përvojë të madhe si orator përpara ndjekësve të tij, në fund të shtatorit Kasemi la përshtypjen e një lideri terrorist shumë të shqetësuar, nga balli i të cilit rridhnin djersë.

Urrejtjenxitësit shiitë në Liban kanë çdo arsye për të pasur frikë për jetën e tyre. Që nga sulmi terrorist i Hamasit palestinez ndaj civilëve të pafajshëm në Izrael më 7 tetor 2023, ushtria izraelite ka eliminuar rreth dhjetë figura kyçe të Hizbollahut. Kasemi, deri vonë, dukej se vepronte më shumë në prapavijë.

Me sa duket, ai nuk ishte zgjedhja e parë për të pasuar Nasrallahun. Pas vrasjes së Nasrallahut, qarkullonin spekulime se kushëriri i tij, Hashem Safedini, mund të merrte drejtimin e Hizbollahut. Por edhe ai u vra nga Izraeli në fillim të tetorit.

Javën e kaluar, zëdhënësi i Hizbollahut, Mohamad Afif, mbajti një konferencë për shtyp në lagjen Dahijeh të Bejrutit. “Ne do të fitojmë”, tha ai, kur papritmas u përhap lajmi se një dron luftarak izraelit ishte në rrugë e sipër. Një gazetar pyeti: “Zoti Afif, çfarë mendoni për këtë?” Zyrtari i Hizbollahut u largua me vrap dhe arriti të thoshte vetëm këto fjalë: “Rezistenca vazhdon.” Skena u përhap mijëra herë në rrjetet sociale dhe shkaktoi tallje dhe të qeshura në Liban.

Naim Kasemi tani drejton një organizatë terroriste që duket qartë se është dobësuar nga sulmet e fundit të Izraelit. Në fillim të tetorit, në mediat arabe dhe izraelite qarkulluan lajme se Kasemi ishte larguar nga Libani nga frika e një atentati nga Izraeli. Thuhet se ai kishte lënë vendlindjen me një avion iranian drejt Teheranit.

Megjithatë, Hizbollahu ende nuk është mposhtur. Pothuajse çdo ditë, kjo turpë guerile sulmon qytetet izraelite si Haifa dhe Tel Aviv me raketa, duke detyruar mijëra njerëz të hyjnë në bunkerë të sigurt. Si një guerilë me përvojë, Hizbollahu praktikon taktikën “godit dhe ik”: grupe të vogla të armatosura shfaqen papritur, hapin zjarr dhe më pas tërhiqen. Për veprime të tilla nuk kërkohen struktura të sofistikuara komanduese.

Kështu që Naim Kasemi ende mund të shkaktojë shumë dëm, pasi luftëtarët e tij supozohet se kanë në dispozicion mbi 150 mijë raketa. Sidoqoftë, është e qartë se Hizbollahu është izoluar ndjeshëm në javët e fundit. Mbështetja nga Irani është më shumë retorike sesa me armë, ndërsa vendet arabe nuk janë të gatshme të mbështesin një grup shiit në Liban.

Naim Kasemi lindi në vitin 1953 në Libanin jugor. Ai është i martuar dhe baba i gjashtë fëmijëve. Që në rininë e tij, ai iu përkushtua luftës për dominimin e shiitëve në Lindjen e Mesme. Ndryshe nga shumica e liderëve të Hizbollahut, të cilët kanë ndjekur shkollat fetare në vendet e shenjta shiite në Irak dhe Iran, Kasemi interesohej edhe për çështjet laike. Ai ka studiuar përveç fesë, edhe kimi dhe frëngjisht. Kështu ai u bë një nga zëdhënësit më të rëndësishëm të Hizbollahut, duke folur shpesh me mediat rajonale dhe ndërkombëtare.

Kasemi u avancua në postin e zëvendëssekretarit të përgjithshëm të Hizbollahut në vitin 1991, kur kjo trupë drejtohej nga Abbas al-Musawi. Al-Musawi u vra në vitin 1992 gjatë një sulmi me helikopter nga Izraeli. Pasardhësi i tij u bë Hassan Nasrallahu.

Karrierën e tij politike Kasemi e filloi në mes të viteve 1970 në lëvizjen shiite Amal, të cilën e braktisti pas Revolucionit Islamik në Iran në vitin 1979 dhe iu bashkua Hizbollahut të sapo themeluar. Atëherë, si edhe sot, shumë fanatikë të Hamasit shikonin nga Teherani. Ata janë formësuar nga regjimi teokratik iranian.

Deri më tani prioritet i Kasemit nuk ishte vetëm lufta kundër Izraelit. Hizbollahu është gjithashtu parti politike në Liban, dhe Kasemi kishte një ndikim të madh në grupin parlamentar të “Partisë së Zotit”, siç përkthehet emri i Hizbollahut në shqip. Ai mbante leksione mbi çështjet teologjike dhe shkroi një libër për jetën e brendshme të Hizbollahut.

Në këtë vepër Kasemi pa dashur zbulon verbërinë ideologjike të organizatës shiite, e cila është më shumë e interesuar në zbatimin e agjendës iraniane në Lindjen e Mesme sesa në mirëqenien e qytetarëve në Liban. Kasemi shkruan se qindra miliarda dollarë i janë ofruar Hizbollahut për rindërtimin e Libanit jugor, nëse anëtarët e tij dorëzojnë armët. “Por ne u thamë atyre se nuk kemi nevojë për ndihmë – dhe se rezistenca do të vazhdojë pavarësisht pasojave.”