Google duhet të shesë shfletuesin Chrome, të ndajë të dhënat dhe rezultatet e kërkimit me konkurrentët, dhe të marrë një sërë masash të tjera për t'i dhënë fund monopolit në kërkimin në internet, kanë argumentuar prokurorët amerikanë para një gjyqtari.
Ndryshime të tilla do të bëjnë që Google të jetë shumë i rregulluar për 10 vjet, duke e nënshtruar atë nën mbikëqyrjen nga e njëjta gjykatë federale e Washingtonit që vendosi se kompania mbante një monopol të paligjshëm në kërkimin në internet dhe reklamat përkatëse, raporton The Guardian.
Google kontrollon rreth 90% të tregut të kërkimit në internet.
“Sjellja e paligjshme e Google i ka privuar rivalët jo vetëm nga kanalet kritike të shpërndarjes, por edhe nga partnerët e shpërndarjes, të cilët përndryshe mund të mundësojnë hyrjen në këto tregje nga konkurrentët në mënyra të reja dhe inovative”, ka thënë Departamenti i Drejtësisë i SHBA-së në një dosje gjyqësore.
Dokumentet gjyqësore të paraqitura të mërkurën mbrëma tregojnë se si SHBA-ja dëshiron t'i japë fund monopolit të Google.
Kompania ka thënë se do të apelojë.
Departamenti ka kërkuar gjithashtu një ndalim që Google të blejë ose të investojë në ndonjë rival kërkimi, produkte të inteligjencës artificiale të bazuara në pyetje ose teknologji reklamimi.
Google do të ketë një shans për të paraqitur propozimet e veta në dhjetor.
