Hendbollistet e Istogut e kanë siguruar finalen e Kupës së Kosovës që luhet të dielën.
Istogu të shtunën në ndeshjen e parë të turneut në palestrën “Karagaçi” në Pejë e mposhti Vushtrrinë me rezultatin 36:28.
Me 14 gola të shënuar tek Istogu u dallua Ana Carolina Gomes. Arlinda Dinarica kontribuoi me gjashtë gola, kurse Yllka Shatri pati katër gola të shënuar.
Te Vushtrria, shtatë gola i pati Albulena Kelmendi.
Istogu, që ishte favorit para këtij ballafaqimi, që nga fillimi i ndeshjes krijoi epërsi të thellë, që në disa momente shkoi edhe deri në dhjetë gola.
Pjesa e parë u mbyll 21:14 në të mirë të Istogut.
Deri në fund të ballafaqimit e ruajti epërsinë dhe nuk lejoi befasi.
Istogu në radhët e veta ka shumë lojtare të huaja, kurse Vushtrria po paraqitet vetëm me lojtare vendore.
Skuadra e drejtuar nga trajneri Faruk Shala po synon që edhe në këtë edicion të festojë në Kupën e Kosovës.
Në vitin e kaluar, Istogu i fitoi të tre trofetë.
