Përfaqësuesja e Kosovës në futbollin e sallës do të ketë kundërshtarë të vështirë për kualifikimet e Kampionatit Evropian 2026.
Në shortin e tërhequr të enjten në Nyon të Zvicrës, Kosova është vendosur në Grupin 10, në të cilën janë edhe Franca, Gjeorgjia dhe Bullgaria.
Këto ndeshje do të luhen me sistem vajtje-ardhje, ndërsa do të zhvillohen nga data 9 dhjetor deri më 16 prill të vitit të ardhshëm.
Vendet e para nga 10-të grupet avancojnë në finalet e “Euro 2026”, ndërsa tetë skuadrat më të mira të vendeve të dyta do të tentojnë kalimin tutje nëpërmjet plejofit.
Ndeshjet e plejofit luhen prej 15 deri më 24 shtator të vitit 2025.
Organizatore e Evropianit të vitit 2026 në futsall do të jenë Letonia dhe Lituania.
Evropiani nis më 18 janar, ndërsa përfundon më 8 shkurt.
Kosova në futsall udhëhiqet nga selektori Agon Ramadani, dhe rezultatet kanë qenë pozitive.
Kosova për herën e parë që nga anëtarësimi në UEFA, do t’i fillojë kualifikimet nga “Main Round”.
Në Grupin 6, Shqipëria do të ballafaqohet me Kazakistanin, Armeninë dhe Danimarkën.
