“Drama” në Paris i takon Barcelonës

Rezervisti Pedri bëri asistim mjeshtëror, ndërsa rezervisti tjetër, Andreas Christensen shënoi golin vendimtar. Falë edhe kontributit të tyre, Barcelona e fitoi 3:2 ndeshjen dramatike ndaj Paris Saint-Germainit, të mërkurën mbrëma në “Parkun e Princave”.
Ishte kjo ndeshja e parë çerekfinale e Ligës së Kampionëve. 

Ashtu si pritej, ndeshja ishte shumë e fortë. Pjesa e parë ishte më e qetë, ndërsa e dyta dukshëm më e zjarrtë.

Raphinha kaloi në epërsi 1:0 Barcelonën në minutën e 37-të. Me rezultatin 1:0 përfundoi pjesa e parë.

Parisienët startuan fuqishëm në pjesën e dytë. Ousmane Dembele barazoi rezultatin në 1:1 në minutën e 48-të, ndërsa menjëherë në minutën e 51-të Vitinha shënoi për 2:1 në të mirë të Parisit. Por ndeshja veçse ishte hapur. 

Pas ndryshimeve të bëra nga Xavi, Pedri në minutën e 62-të asistoi për Rahphinhan që shënoi për 2:2. Pedri bëri asistimin me prekjen e parë të topit, pas rikthimit nga lëndimi.
Barcelona shënoi golin e fitores 3:2 në minutën e 77-të. 

Mbrojtësi  Christensen shënoi me goditje me kokë, pas një krosimi nga Ilkay Guendogan.

Parisi goditi traversën e shtyllën, por nuk shënoi  dot golin e tretë. Dhe kështu fitorja e madhe i takoi Barçës, që është në pozitë të volitshme para ndeshjes së kthimit.

Ndeshja e kthimit është më 16 prill në stradiumin “Lluis Companys” në Barcelonë.

Barcelona sërish në epërsi

Barcelona ka kaluar në epërsi 3:2 ndaj PSG-së.

Mbrojtësi Andreas Christensen shënoi me goditje me kokë në minutën e 77-të.

Christensen u aktivizua si zëvendësues.

Parisi godet shtyllën, rezultati mbetet 2:2

Vazhdon drama e futbollit në “Parkun e Princave”.

Rezultati në ndeshjen mes Parisit dhe Barcelonës është 2:2.

Në minutën e 75-të parisienët goditën shtyllën. Më herët në ndeshje kanë goditur edhe traversën. Rastet nuk po i mungojnë as Barcelonës.

Barazon Barça, shënon sërish Raphinha

Barcelona ka barazuar në 2:2 rezultatin në ndeshjen ndaj Parisit.

Golin e shënoi Raphinha në minutën e 62-të. I njëjti lojtari kishte shënuar për 1:0 në minutën e 62-të.

Parisi i pandalshëm, shënon golin e dytë

Menjëherë në minutën e 51-të, PSG-ja kaloi në epërsi 2:1 ndaj Barçës.

Vitinha ishte realizator.

Barazon Parisi, shënon Dembele

Parisi është kthyer në lojë ndaj Barcelonës.

Për 1:1 shënoi Ousmane Dembele në minutën e 48-të. Ai shënoi me goditje të fortë nga zona.

Barcelona në epërsi pas pjesës së parë

Barcelona ka shkuar në pushim mes pjesëve me epërsinë 1:0.

Golin e vetëm në pjesën e parë e shënoi braziliani Raphinha, në minutën e 37-të.

Barcelona në epërsi ndaj PSG-së në derbi

Pas disa tentimeve, Barcelona ka arritur ta shënojë golin e parë në derbin ndaj Paris Saint-Germainit në “Parkun e Princave”.

Golin për Barcelonën e shënoi Raphinha në minutën e 37-të.

Gianluigi Donnarumma bëri dalje të pasigurt, ndërsa në portën e zbrazët shënoi sulmuesi brazilian i krahut.

Barcelona me rastin e parë serioz ndaj PSG-së

Paris Saint-Germaini kishte paraqitje më të mirë në minutat e para të ndeshjes ndaj Barcelonës, por spanjollet e patën mundësinë më të mirë për shënim.

Robert Lewandowski gjuajti me kokë në minutën e 20-të, por topi u largua nga vija e portës nga mbrojtja kundërshtare.

Lewandowski në edicionin aktual ka shënuar 20 gola në 40 paraqitje.

Nga ana tjetër, Kylian Mbappe mbetet rreziku më i madh për portën e Marc-Andre ter Stegenit.

Mbappe ka shënuar 39 gola në 40 paraqitje në të gjitha garat.

Befasi në formacionet e ndeshjes PSG – Barcelona

Luis Enrique, trajneri spanjoll i Paris Saint-Germainit, ka kthyer formacionin më të fortë për duelin derbi ndaj Barcelonës. 

Ai ka bërë 10-të ndryshime nga ekipi titullar që barazoi 1:1 me Clermontin në Ligue 1 të shtunën. 

Mesfushori spanjoll, Marco Asensio, është i vetmi futbollist që e ka ruajtur vendin, ndërsa Kylian Mbappe, portieri Gianluigi Donnarumma dhe kapiteni Marquinhos, janë kthyer titullar.

Formacioni i PSG-së: 
Donnarumma, Hernandez, Marquinhos, Lucas Beraldo, Nuno Mendes, Lee, Vitinha, Fabian Ruiz, Dembele, Mbappe, Asensio.

Trajneri Xavi Hernandes ka bërë dy ndryshime te formacioni i Barcelonës që mposhti 1:0 skuadrën e Las Palmasit. 

Ronald Araujo do të jetë në qendër të mbrojtjes bashkë me 17-vjeçarin Pau Cubarsi, që bëhet mbrojtësi më i ri që nis një ndeshje çerekfinale të Ligës së Kampionëve. 

Ndryshimi tjetër është në mesfushë, pasi Frenkie de Jong e zëvendëson Fermin Lopezin. 

Titullar është edhe 16-vjeçari Lamine Yamal.

Formacioni i Barcelonës: 

Ter Stegen, Kounde, Araujo, Cubarsi, Cancelo, Roberto, De Jong, Gundogan, Yamal, Lewandowski, Raphinha.