Minibiblioteka e parë në Kosovë me libra në gjuhën rome

Ka dy vjet që për herë të parë në Kosovë ishte hapur një minibibliotekë me libra në gjuhën rome.

Minibiblioteka rome në Prizren kishte qenë iniciativë e mësimdhënëses së kësaj gjuhe, Urma Menekshe, e cila deri më tani me ndihmën e Ministrisë së Kulturës e po ashtu të autorëve vendës e të huaj ka arritur të grumbullojë afro 400 tituj të shkruar dhe përkthyer në gjuhën rome.

Mësimdhënësja thotë se minibiblioteka është një shtyllë  për komunitetin rom në Prizren.

Poezitë e Kujtim Paçakut mbesin të preferuarat e lexuesve, por edhe përmbledhja e gojëdhënave dhe e përrallave nga mësimdhënësja është libri i ri që po pëlqehet mjaft shumë nga masa.

Shyret Hoxhaj është një nga lexueset e rregullta të kësaj minibiblioteke.
Gjuha rome për të kishte qenë e njohur, por me anë të librave e përvetësoi më shumë.

Pos gjuhës shqipe, edhe ajo rome është tejet e vështirë për ta mësuar, thotë Hoxhaj, por njohja e saj, sipas saj, është pasuri.

Minibiblioteka në Prizren, pos qëllimit kryesor që ka në grumbullimin e titujve të tjerë në gjuhën rome, për qëllim ka të ndihmojë edhe komunat e tjera. 

Deri tash kanë shpërndarë libra në 4 vendbanime tjera. E në Qeverinë e Kosovës, po ashtu, është i ndarë një kënd me libra që flasin për historinë e gjuhën rome.