Agim Pajaziti me këngë për personat me nevoja të veçanta

“Kam ardhur me e taku njërin nga miqtë e mi më të dashur. Agimin, ngaqë është në karrocë, gjithmonë vij e takoj edhe e nxjerr për shëtitje. Kështu që po shkoj dhe bashkë e takojmë”.

Takimet me Agim Pajazitin, Shkurta Haxhiu i ka të shpeshta.

Janë miq prej vitesh, andaj me t’u takuar i nisin bisedat e përbashkëta.

Ky është Agimi nga Podujeva, i cili asnjëherë nuk u pengua nga gjendja shëndetësore për t’u marrë profesionalisht me muzikë, pasion i tij kaherë.

Këngë me motive patriotike këndon shpesh, por së fundi këngë u dedikoi edhe personave me nevoja të veçanta.

Nga banesa po dilnin së bashku për të shkuar te lokali ku Agimi i kalon nga dy orë çdo ditë.

Edhe për Agimin, njësoj sikurse për shumë persona me nevoja të veçanta, sfidë mbesin dalja nga banesa e lëvizja nëpër rrugë.

Megjithatë, fat të mirë për të, 39-vjeçari e konsideron ndihmesën nga familjarët e miqtë që e shoqërojnë çdo ditë.

Ndjeshmëria që ka për këtë kategori, bën që Agimit t’i kujtohen rastet kur ka hasur në paragjykime a mungesë kujdesi ndaj tyre.

Vetë Agimi kishte hasur në vështirësi për të marrë shërbimet që i duheshin, andaj ka një kërkesë drejtuar institucioneve.