Zayn Malik ka shtyrë turneun e tij të ardhshëm në SHBA pas "humbjes” së shokut të tij të grupit “One Direction”, Liam Payne.
Payne vdiq në moshën 31-vjeçare, pasi u rrëzua nga kati i tretë i ballkonit të hotelit, të mërkurën në Argjentinë, raporton BBC.
Malik ishte gati të fillonte turneun e tij në SHBA javën e ardhshme, duke nisur me një shfaqje në San Francisko të mërkurën.
Megjithatë, këngëtari u ka thënë fansave se po i shtynte shfaqjet.
“Duke pasur parasysh humbjen zemërthyese të përjetuar këtë javë, unë kam marrë vendimin të shtyj turneun në SHBA”.
Pjesa amerikane e turneut të Malik përfshinte gjithashtu Las Vegasin, Los Anxhelosin, Washington DC, duke përfunduar në Neë York më 3 nëntor.
Ai u ka thënë fansave në X se datat do të ricaktohen për në janar dhe biletat do të mbeten të vlefshme për datat e reja.
“Ju dua të gjithëve dhe faleminderit për mirëkuptimin”, ka shtuar ai.
31-vjeçari nuk ka përmendur 11 datat e turneut të tij në Mbretërinë e Bashkuar, i cili pritet të zgjasë nga 20 nëntor deri më 4 dhjetor.
Payne dhe Malik fituan famë globale si pjesë e grupit “One Direction”, i cili u krijua në shfaqjen televizive X Factor në vitin 2010, së bashku me shokët e grupit Harry Styles, Louis Tomlinson dhe Niall Horan.
Malik u largua nga grupi në vitin 2015 për të nisur një karrierë solo, dhe grupi u nda më vonë në vitin 2016.
