Tom Holland pjesë e filmit të ri të Christopher Nolanit

Aktori i njohur britanik Tom Holland do të jetë pjesë e kastit të aktorëve në filmin e ri që do ta bëjë regjisori i njohur Christopher Nolan. Filmit do t’i bashkohen edhe aktorë të tjerë të famshëm si Matt Damon.

Nolan e ka shkruar skenarin dhe do të jetë edhe regjisor në këtë projekt, distributor  i të cilit do të jetë kompania “Universal Pictures”, e cila si datë e lansimit të filmit e ka cekur  muajin korrik të vitit 2026, ka shkruar “The Hollywood Reporter”.

Detaje të tjera nuk janë publikuar, ndërkohë që është raportuar se producentë do të jenë Nolan bashkë me gruan Emma Thomas dhe një tjetër partner.

Bashkëpunimi i ri bashkon Nolanin me studion që e ka bërë dramën, “Oppenheimer”, me të cilën e fitoi çmimin “Oscar”. Filmi i cili ka mbledhur 976 milionë dollarë në mbarë botën, në ngjarjen e ndarjes së çmimeve “Oscar”, ka fituar çmimet “regjisori më i mirë” dhe “filmi më i mirë”.

Filmi “Oppenheimer” shënoi herën e parë që regjisori ka bashkëpunuar me kompaninë “Universal Pictures”, një marrëdhënie kjo e cila ndodhi pasi Nolan u shkëput nga bashkëpunëtori i kamotshëm “Warner Bros” në fund të vitit 2020.