Këngëtarja dhe aktorja amerikane, Selena Gomez, i është bashkuar yjeve të tjerë në tapetin e kuq në Festivalin e Filmit në Londër të premten, për premierën në Mbretërinë e Bashkuar të filmit të saj “Emilia Perez”.
Muzikali në gjuhën spanjolle ishte një nga filmat kryesorë të Festivalit të Filmit në Kanë në fillim të këtij viti, ku Gomezi dhe tri nga yjet e tjera u shpallën bashkërisht aktorja më e mirë, raporton BBC.
Aktoret e tjera Zoe Saldana, Adriana Paz dhe Karla Sofia Gascon u shfaqën përkrah Gomezit në Londër, ku filmi shpreson të vazhdojë vrullin e tij në garën e çmimeve.
“Emilia Perez” ndjek një udhëheqës të kartelit meksikan (të luajtur nga Gascon), i cili i kërkon një avokateje me fuqi të lartë të quajtur Rita (Saldana) ta ndihmojë atë të falsifikojë vdekjen e tij.
Por arsyeja pse ai dëshiron të tërhiqet dhe të zhduket nga bota e krimit nuk është ajo që mund të prisni - udhëheqësi i kartelit dëshiron të ndryshojë gjininë dhe të jetojë një jetë të re si grua.
Pjesa tjetër e filmit fokusohet në katër gra, duke përfshirë Emilia Perezin, teksa secila ndjek versionin e vet të lumturisë në Meksikën moderne.
Perez portretizohet nga aktorja trans spanjolle Gascon, e cila është cilësuar si një pretendente e mundshme e aktores më të mirë në garat e ardhshme të çmimeve.
Gomez luan rolin e gruas së liderit të drogës, e cila mbahet në errësirë për identitetin e ri të ish-dashnorit të saj.
Të katër yjet e filmit kaluan në tapetin e kuq përpara premierës së filmit në Mbretërinë e Bashkuar në Royal Festival Hall si pjesë e Festivalit të Filmit në Londër të premten.
