Selena Gomez ka deklaruar se nuk i vjen turp që ka pranuar se nuk mund të mbajë fëmijë dhe se ka çrregullim bipolar.
Aktorja 32-vjeçare e "Wizards of Waverly Place", kishte thënë se po planifikon të birësojë një fëmijë, përpara se të takonte të dashurin e saj producent muzikor, Benny Blanco, 36 vjeç, me të cilin është në lidhje që nga viti 2023.
Por më pas zbuloi se i është dashur të pajtohet me faktin se ajo nuk do të mund të bëhet nënë natyrshëm për arsye mjekësore.
“Unë me të vërtetë besoj se ka fuqi në të qenit i gatshëm t'u thuash njerëzve kur keni nevojë për ndihmë, kur doni ndihmë. Kjo nuk është e turpshme. Pra, po, kam thënë që nuk mund të mbaj një fëmijë.
Po, kam treguar po ashtu se kam çrregullim bipolar. Kështu është jeta ime”, është shprehur ajo në ngjarjen “Women in Film”, në të cilën mori pjesë së bashku me motrën e saj 11-vjeçare, Gracie Elliott Teefey.
Selena ka shtuar se ajo dëshiron të "avokojë për gratë" dhe kjo është arsyeja pse ajo ndan dhimbjen e saj.
“Kjo është arsyeja pse më pëlqen të jem e sinqertë, sepse të gjithë po kalojnë diçka. Kështu që kurrë mos lejoni që dikush t'ju thotë se nuk jeni një person i mirë, se nuk jeni i sjellshëm, se nuk i trajtoni njerëzit me respekt”, ka deklaruar ajo.
Selena zbuloi në numrin e tetorit të “Vanity Fair” se ajo nuk është në gjendje të mbajë fëmijë.
“Kam shumë probleme mjekësore që do të rrezikonin jetën time dhe të foshnjës”, ishte shprehur Gomez.
