-
Përktheu:
Vita Abrashi-Kajtazi
- 26 mars 2025 09:29
- Shpërndaje në:
Aktori i njohur francez, Gérard Depardieu, ka pranuar në gjykatë se ka kapur për ijë një grua që e ka akuzuar për sulm seksual, por pretendon se ky veprim ishte për të shmangur rrëzimin dhe nuk kishte karakter seksual, ka raportuar “The Guardian”.
Në gjykatën penale të Parisit, Depardieu ka thënë “e kapa për ijë”, ndërsa gjykatësi ka bërë të ditur se kjo dëshmi ndryshonte nga ajo e dhënë më parë gjatë hetimeve, kur ai kishte mohuar çdo kontakt fizik.
Depardieu, 76 vjeç, po gjykohet për dy raste të pretenduara të sulmeve seksuale ndaj një dekoratoreje setesh 54-vjeçare dhe një asistenteje regjie 34-vjeçare gjatë xhirimeve të filmit “Les Volets Verts” në Paris në vitin 2021. Nëse shpallet fajtor, ai mund të dënohet deri në pesë vjet burg dhe gjobë prej 75,000 eurosh.
Aktori ka mohuar çdo akuzë.
“I mohoj të gjitha”, ka thënë ai në gjykatë.
Ylli ka shpjeguar se e kishte kapur gruan për ijë për të shmangur rrëzimin.
“Isha shumë i lodhur, ishte fundi i xhirimeve dhe ishte një e premte e nxehtë”, ka thënë ai.
Dekoratorja e setit, e identifikuar si Amélie, ka dëshmuar në gjykatë se Depardieu kishte bërë komente vulgare dhe fyese ndaj saj, përfshirë: “Është kaq nxehtë, nuk kam ereksion” dhe “di si ta bëj një grua të arrijë në orgazëm pa e prekur fare”.
Amélie ka pretenduar se Depardieu e kapi për ijë, e tërhoqi drejt tij dhe e bllokoi mes kofshëve, duke e prekur në zona intime.
“Më kapi shumë fort. Më kujtohen sytë e tij të mëdhenj, të kuq dhe të zemëruar. Kam ndjerë një egërsi tek ai, ishte sikur kënaqej duke më frikësuar”, ka thënë ajo.
Depardieu ka mohuar këto pretendime, duke thënë se kishte qenë i pakënaqur me punën e Amélies si dekoratore, sepse një skenë dhome nuk ishte përgatitur mirë. Ai shtoi se me peshën e tij prej 150 kilogramësh nuk do të kishte mundësi të mbante dikë mes kofshëve.
“Mund të bëni një provë nëse doni, me këtë bark që kam, nuk është e mundur”, ka thënë ai.
Aktori ka pranuar se përdorte gjuhë të vrazhdë gjatë xhirimeve, por pretendoi se këto komente ishin për të qenë “provokues” dhe për të relaksuar atmosferën.
I pyetur nga gjykatësi nëse kishte thënë: “Është kaq nxehtë, nuk kam ereksion”, ai u përgjigj: “Mbase e kam thënë, pse jo?”.
Depardieu ka kritikuar lëvizjen #MeToo, duke thënë se akuzat kundër tij janë përdorur për të dëmtuar reputacionin e tij.
“Kjo lëvizje do të bëhet terror”, ka thënë ai.
Gjyqi ndaj tij vazhdon.
