-
Përgatiti:
Vita Abrashi-Kajtazi
- 14 nëntor 2024 15:05
- Shpërndaje në:
Në Riad të Arabisë Saudite, disenjatori i njohur libanez, Elie Saab, organizoi një shfaqje spektakolare mode për ta festuar 45-vjetorin e karrierës së tij.
Ngjarja e mbajtur në “The Venue” gjatë festivalit të përvitshëm dimëror të “Riyadh Season”, solli koleksionin “1001 Seasons of Elie Saab”, koleksion me përmbajtje prej 300 fustanesh, ka shkruar “Vogue Arabia”.
Koleksioni i “Riyadh Season Collection Fall 2025” ishte krijuar ekskluzivisht për këtë ngjarje dhe ishte i frymëzuar nga tregimet klasike arabe të “Njëmijë e një netëve”, të cilat u risollën përmes vizionit të veçantë të Saab. Koleksioni ishte i stiluar nga Carine Roitfeld, themeluesja dhe redaktorja kryesore e CR Fashion Book dhe ish-redaktorja e prestigjiozes “Vogue France”.
Me një premtim për të bashkuar modën dhe argëtimin, ngjarja “1001 Seasons of Elie Saab” solli në skenë emra të njohur si aktoren e këngëtaren Jennifer Lopez, këngëtaren Celine Dion, yjet si Nancy Ajram e Amr Diab, si dhe Camila Cabello, të cilat ofruan performanca të paharrueshme. Ndërkohë kasti i supermodeleve, përfshirë Isabeli Fontana, Candice Swanepoel, Adriana Lima, Sara Sampaio, dhe shumë të tjera, ecën në pasarelë.
Shfaqja filloi me një moment që “Vogue” e ka cilësuar si të jashtëzakonshëm, kur Halle Berry mori vëmendjen e të gjithëve me fustanin ikonik të disajnuar nga Saab, të cilin e kishte veshur në ceremoninë e ndarjes se Çmimeve “Oscar” në vitin 2002.
Ajo ka zbuluar se ky ishte takimi i parë me Saab pas 22 vjetësh, që nga momenti kur e veshur me krijimin e tij, ajo shkëlqeu në tapetin e kuq të “Oscars”.
Pas Halle Berryt shfaqja kaloi në ritme muzikore të ndezura nga Jennifer Lopez, e cila zbriti nga lart në një kostum të mbushur me pendë dhe perla, po ashtu i disajnuar nga Saab.
Modelet që ecën në pasarelë përputheshin me performancën e Lopezit, të veshura me kostume të inspiruara nga vitet ’20, me detaje të shumta.
Camila Cabello u shfaq më pas në një fustan rozë me shkëlqim, ndërsa kishte mbathur çizme të mbushura me lule dhe kristale, që dominuan skenën.
Performancat e Nancy Ajram dhe Amr Diab sollën ritme të dashura të muzikës arabe, ndërsa përfundimi i shfaqjes ishte i jashtëzakonshëm me shfaqjen që bëri Celine Dion me hyrje madhështore në skenë.
Kjo ishte hera e tretë që ajo u shfaq në publik, dhe e dyta që nga rikthimi i saj në skenë pas Olimpiadës së Parisit 2024. Performanca e Dionit emocionoi të pranishmit pasi u solli lot në sy shumë shikuesve.
Ndër të ftuarit më të shquar në rreshtin e parë ishin emra të njohur të rajonit si: Nadine Nassib Njeim, Fatima AlBanawi, Razanne Jammal, Elissa, Maritta Hallani, dhe Rym Saidi.
Në tapetin e kuq shumë yje flisnin me Vogue Arabia duke treguar dashurinë që kanë për Saab, krijimet e tij dhe kujtimet më të dashura që kanë me këtë markë.
Roli i Elie Saab në ngritjen e modës arabe në skenën ndërkombëtare është një nga historitë më të bukura të industrisë së modës.
Siç u pa në këtë ngjarje, kreativiteti, kultura arabe dhe fuqia e yjeve janë shtyllat kryesore të suksesit të tij 45-vjeçar, i cili ka lënë gjurmë me emrin e tij si një nga markat më të dashura dhe të njohura në botën e modës.
