Beyonce tregon se përse nuk po u bën videoklipe këngëve

Që nga momenti kur fryu çamçakëz në “Crazy In Love” e deri në ditën kur shkatërroi një grup veturash me një shkop bejsbolli në “Hold Up”, Beyonce ka krijuar disa nga videot muzikore më të paharrueshme të popit.

Mjeshtëria e saj përputhej me atë të Madonnas dhe Michael Jacksonit në vitet 1980, me videot për albumin e saj “Lemonade” që ishin krijuar si një festë e fuqishme e gruas me ngjyrë dhe fuqisë së gruas në përgjithësi.

Pastaj, krejt papritur, ajo u ndal. 

Dy albumet e saj të fundit, “Renaissance” dhe “Cowboy Carter”, kanë mbetur pa anën vizuale, duke i lënë fansat të hutuar.

Mirëpo Beyonce, e njohur ndryshe edhe si “diva” e muzikës, ka shpjeguar vendimin e saj në një intervistë të rrallë për revistën GQ, duke thënë se ajo nuk donte që videot e saj të bëheshin një "shpërqendrim nga cilësia e zërit dhe muzikës".

“Mendova se është e rëndësishme që në një kohë ku gjithçka që ne shohim janë pamjet vizuale, bota të fokusohet tek zëri”, ka shpjeguar këngëtarja 43-vjeçare.

Ajo ka shtuar se incizimet e saj të fundit, të cilat synojnë të kontekstualizojnë kontributet e muzikantëve me ngjyrë, shpesh të anashkaluar në zhanre si house, disco dhe country, duhej të qëndronin "të pa prekura".

"Muzika është kaq e pasur me histori dhe instrumente. Duhen muaj për t'u analizuar, hulumtuar dhe kuptuar. Muzika kishte nevojë për hapësirë, për të marrë frymë”, ka shpjeguar ajo.

Duke folur për albumin e saj “Renaissance”, ajo ka thënë se përvoja e koncerteve “live” ishte më e rëndësishme se xhirimet e videove muzikore.

Albumi, i publikuar në vitin 2022, u shkrua gjatë pandemisë dhe u konceptua si "një vend për të ëndërruar dhe për të gjetur shpëtim gjatë një kohe të frikshme për botën". 

Intervista, e cila u zhvillua për të promovuar markën e re të uiskit të yllit, shënon herën e parë që Beyonce ka folur gjatë për karrierën e saj që nga një intervistë e përbashkët me motrën e saj Solange, në 2017.

Beyonce u tërhoq nga intervistat rreth viteve 2013-2014, duke zgjedhur në vend të kësaj të shkruante ese personale për botime si “Vogue”, ose duke iu drejtuar fansave direkt në mediat sociale.

Intervista për GQ nuk zbuloi shumë për jetën personale të këngëtares, me pak përjashtime.

Ajo ka thënë se ka hequr dorë nga mishi (përveç gjeldetit) gjatë verës, teksa duke folur për inteligjencën artificiale, ka thënë se kohët e fundit dëgjoi një këngë të krijuar nga AI "që tingëllonte aq shumë si ajo sa e kishte trembur”.

Ylli ka folur gjithashtu për përpjekjet e saj për të mbrojtur familjen e saj nga mediat. 

“Një gjë për të cilën kam punuar jashtëzakonisht shumë është të sigurohem që fëmijët e mi të kenë sa më shumë normalitet dhe privatësi, duke u siguruar që jeta ime personale të mos kthehet në markë. Kam bërë një përpjekje ekstreme për të qëndruar besnike ndaj kufijve të mi dhe për të mbrojtur veten dhe familjen time. Asnjë shumë parash nuk vlen për paqen time”, është shprehur ajo.

Artikulli u publikua një ditë pasi u zbulua se Beyonce ishte shpërfillur nga “Country Music Awards”, pasi albumi i saj “Cowboy Carter” nuk arriti të fitonte një nominim të vetëm në ceremoninë më prestigjioze të zhanrit.

Muzika e saj u anashkalua pavarësisht se u bë albumi i parë i një gruaje me ngjyrë që arriti të renditej i pari në tabelën e albumeve të vendit në SHBA, dhe kënga “Texas Hold 'Em” kaloi dy javë në krye të klasifikimit të këngëve të vendit.

Babai dhe ish-menaxheri i këngëtares, Matthew Knowles, kritikoi organizatorët e shfaqjes së çmimit, duke thënë se vendimi për të anashkaluar “Cowboy Carter” "flet vetë".