Ka arritur në 61 numri i të vdekurve nga zjarri në një klub nate në Maqedoninë e Veriut, pasi edhe një i ri ka vdekur si pasojë e lëndimeve.
Ministria e Shëndetësisë e Maqedonisë së Veriut ka konfirmuar të martën se bëhet fjalë për një 29-vjeçar i cili ishte duke u trajtuar në Lituani.
Ai po vuante nga djegiet dhe problemeve respiratore, dhe është pacienti i dytë që vdes në Lituani në javën e fundit.
Zjarri i 16 marsit ka shpërthyer gjatë një shfaqjeje piroteknike në një koncert brenda një klubi nate të mbushur plot, në qytetin lindor të Koçanit.
Rreth 650 persona ndodheshin brenda në atë kohë, sipas autoriteteve të ndjekjes, dhe shumica e viktimave ishin të rinj.
Shtatë të lënduar janë të shtruar në spital në Maqedoninë e Veriut, ndërsa 64 të tjerë po trajtohen jashtë vendit në spitale anembanë Evropës, ka thënë ministri i Shëndetësisë, Arben Taravari.
Hetuesit po hetojnë shkeljet e sigurisë dhe lejet e paligjshme të funksionimit.
Tridhjetë e katër persona janë në paraburgim, duke përfshirë një ish-ministër Financash dhe shtatë oficerë të lartë policie.
Prokurorët kanë thënë se të gjithë, përveç njërit prej të dyshuarve përballen me dënime të mundshme deri në 20 vjet nëse shpallen fajtorë.
