Dodiku ripërsërit kërcënimin për shkëputje nga Bosnja

Udhëheqësi i entitetit serb të Bosnjës ripërsëriti të mërkurën kërcënimin e tij për t'u shkëputur nga vendi ballkanik, një ditë përpara një votimi të planifikuar të OKB-së për krijimin e një dite vjetore për të përkujtuar gjenocidin ndaj më shumë se 8,000 myslimanëve të Bosnjës nga serbët e Bosnjës në vitin 1995. 

Rezoluta e propozuar e OKB-së, e sponsorizuar nga Gjermania dhe Ruanda, ka ngjallur protesta dhe një fushatë të fortë lobimi kundër kësaj mase, nga presidenti i entitetit Republika serbe, Milorad Dodik, dhe presidenti populist i Serbisë fqinje, Aleksandar Vuçiq, raporton AP.

Të dy krerët thonë se rezoluta do t'i cilësonte të gjithë serbët si njerëz që kryejnë gjenocid megjithëse drafti nuk i përmend në mënyrë eksplicite serbët si fajtorë. 

Më 11 korrik 1995, serbët e Bosnjës pushtuan një zonë të sigurt të mbrojtur nga Kombet e Bashkuara në Srebrenicë. Ata ndanë të paktën 8,000 burra dhe djem myslimanë boshnjakë nga gratë, nënat dhe motrat e tyre, dhe i vranë. 

Asambleja e Përgjithshme e OKB-së ka caktuar një debat mbi rezolutën të enjten në mëngjes, i cili do të pasohet nga një votim në organin botëror prej 193 anëtarësh. Serbët kanë mbështetjen e aleatëve të tyre Rusisë dhe Kinës, ndërsa rezoluta mbështetet nga SHBA-ja dhe shumica e shteteve të tjera perëndimore. 

Dodik ka shkruar në platformën e mediave sociale X se rezoluta e OKB-së po i detyrohet vendit nga mbështetësit e boshnjakëve myslimanë dhe se ajo do ta ndajë vendin.

"Bosnja dhe Hercegovina ka arritur fundin e saj, ose për të qenë më të saktë, ajo u soll aty nga ata që u betuan për të. Gjithçka që mbetet është që ne të gjithë të bëjmë përpjekje për të qenë fqinjë të mirë dhe të ndahemi në paqe”, ka shkruar ai.

Dodiku ka bërë kërcënime të tilla disa herë edhe në të kaluarën. Ai dhe disa liderë të tjerë serbë të Bosnjës janë nën sanksione të SHBA-së dhe Britanisë pjesërisht për rrezikimin e një plani paqeje të SHBA-së që i dha fund luftës së Bosnjës 1992-95.

Vrasjet e Srebrenicës ishin kulmi i përgjakshëm i luftës, e cila erdhi pasi shpërbërja e Jugosllavisë nxori pasionet nacionaliste dhe ambiciet territoriale që i vendosën serbët e Bosnjës kundër dy popullsive të tjera kryesore etnike të vendit, kroatëve dhe boshnjakëve myslimanë. 

Gjykata Ndërkombëtare e Drejtësisë, gjykata më e lartë e OKB-së, përcaktoi në vitin 2007 se aktet e kryera në Srebrenicë përbënin gjenocid dhe përcaktimi i gjykatës përfshihet në projekt-rezolutën. 

Ishte gjenocidi i parë në Evropë që nga Holokausti nazist në Luftën e Dytë Botërore, i cili vrau rreth 6 milionë hebrenj dhe njerëz nga pakicat e tjera.

LEXO EDHE: